London Ali Məhkəməsi WikiLeaks-in yaradıcısı Culian Assancın ekstradisiyası ilə bağlı ABŞ-ın müraciətini təmin edib.

Teleqraf.com xəbər verir ki, məhkəmə ABŞ-ın apelyasiya şikayətinə oktyabrın 27 və 28-də baxsa da, qərar bu gün elan edilib.

Buradan belə nəticə çıxır ki, iş Vestminster rayon məhkəməsinə qaytarılıb, Assanc həbsdə qalacaq.

Culian Assanc Əfqanıstan və İraqda hərbi əməliyyatlar zamanı ABŞ-ın qanunsuz hərəkətlərini ifşa edən materialı ilə dünyada məşhurdur. Jurnalist hərbi əməliyyatlar zamanı dinc əhalinin öldürülməsi, eləcə də Amerikanın Kubadakı Quantanamo həbsxanasında saxlanma şəraiti ilə bağlı məlumatları dərc edib.

2010-cu ildə o, İsveçdə təcavüz və qısnamada ittiham olunub. Assanc hər şeyi inkar edib. Bildirib ki, ondan şikayət edən qadınlar qisas məqsədilə və polisin təsiri altında hərəkət ediblər. Daha sonra iş bağlanıb, sonra bərpa edilib və 2019-cu ilin noyabrında yenidən bağlanıb.

WikiLeaks-in qurucusu ekstradisiyadan qorxaraq 2012-ci ilin iyun ayından Ekvadorun Londondakı səfirliyində gizlənirib. 11 aprel 2019-cu il səhəri o, ABŞ-ın tələbi ilə saxlanılıb, o vaxtdan bəri Belmarş ciddi rejimli həbsxanadadır. Amerika tərəfi Assanca qarşı casusluq haqqında qanunun pozulması və məxfi məlumatların açıqlanması ilə bağlı 17 epizod üzrə yeni ittihamlar irəli sürüb. Ekstradisiya edilərsə, onu 175 ilə qədər həbs gözləyir.