Azyaşlı uşaqlar dinin nə olduğunu dərk etmir.

Elə mərasimlərdə baş verən hadisələrdə nə olduğunu anlamırlar. Bu onlar üçün uşaq yaşda qazanılan böyük travmadır.

Bu sözləri Axar.az-a uşaq psixoloqu Aysel Mahmudova uşaqların dini mərasimdə iştirak etməsinə münasibət bildirərkən deyib. Psixoloq məsləhət görür ki, uşaqlar bu tip mərasimlərdən uzaq tutulsa, daha yaxşı olar:

“Valideynlər uşaqları üçün bu təhlükəni nəzərə almalıdır. Uşaqlar bu mərasimi din kimi başa düşüb qəbul etmir. O, bunu ailəsinin adət-ənənəsi kimi görür, qəbul edir. Qanun da, valideyn də uşağının bu tip mərasimlərdə iştirakına izn verə bilər. Lakin bunun uşağın psixologiyasına hansı formada təsir edəcəyini nəzərə almaq lazımdır. Təəssüf ki, bəzi valideynlər uşaq üçün ən böyük təhlükənin qan və şiddət olduğunu hesab edirlər. Ancaq nəzərə almaq lazımdır ki, adi göz yaşı, bərk səslə ağlaşma da uşaq üçün böyük və sağalmaz travmadır”.

Psixoloq bildirib ki, uşaqları yas mərasimindən necə uzaq tuturuqsa, belə dini mərasimlərdən də uzaq tutmalıyıq:

“Evlərdə yas mərasimi olduğu anlarda oradan uşaqlar uzaqlaşdırılır, hadisələrə şahid olmaması üçün başqa yerə aparılır. Dini mərasimlər də bu baxımdan təhlükəlidir. Bərk səslə ağlaşmaya, özünü döyməyə şahid olan uşaq necə nikbin düşünə bilər? Belə tarvmalar uşaqlarda özünəqapanma, səbəbsiz ağlama, tək qalmaqdan qorxma halları ilə müşahidə edilə bilər. Yaş artdıqca travma da böyüyəcək”.