Azərbaycan neftinin dünya birjasında bahalaşması ölkənin xarici borclarında rəqəm dəyişikliklərinə səbəb ola bilər.

Bu sözləri iqtisadçı Natiq Cəfərli Maliyyə Nazirliyinin Azərbaycan Respublikasının xarici dövlət borcu ilə bağlı açıqlaması haqda Axar.az-a danışarkən deyib. Onun sözlərinə görə, Azərbaycanın götürdüyü borcun artıq istifadə edilmiş hissəsi qeyd olunub:

“Azərbaycanın birbaşa dövlət zəmanətilə aldığı borclar var. Azərbaycan il ərzində bir neçə böyük borc müqaviləsi imzalayıb. Bu borc müqavilələri realizə olunmadığı üçün Maliyyə Nazirliyi onu rəsmi şəkildə qeydiyyatdan keçirməyib. Azərbaycanın rəsmi borcunun ümumdaxili məhsula olan nisbəti 18,9% təşkil edirsə, bu rəqəmlərin dəyişilməsi gözlənilir”.

Ekspert bildirib ki, Azərbaycan neftinin qiymətinin kəskin dəyişməsinin səbəbləri var:

“Azərbaycan neftinin qiyməti son zamanlar çox dalğalıdır. 2 həftə əvvəl 49 dollara qədər ucuzlaşmışdı. Hazırda bu qiymət 52-54 dollar təşkil edir. Qiymətin dəyişməsinin əsas səbəblərindən biri dünya birjasında dolların qiymətinin ucuzlaşması olub. Dolların ucuzlaşması neftin qiymətinə birbaşa təsir edən amildir.

Dünyada nə qədər yazılı və ya şifahi bəyanatlar verərək neftin qiymətini kəskin artırmaq istəsələr də, bu, alınmır. Çünki Amerikadakı neft hasilatının artması qiymətlərə ciddi təsir göstərir. Ancaq Azərbaycan neftinin kəskin ucuzlaşmasını yaxın bir neçə il ərzində gözləmək düzgün deyil”.

Qeyd edək ki, Maliyyə Nazirliyindən verilən məlumata görə, 1 iyul 2017-ci il tarixinə Azərbaycan Respublikasının xarici dövlət borcu 7 mlrd. 172,6 mln. ABŞ dolları (12 mlrd. 208,5 mln. manat), xarici dövlət borcunun Ümumi Daxili Məhsula (ÜDM) olan nisbəti 18,9% təşkil edib. Azərbaycan neftinin qiyməti avqustun 23-də 54,12 dollar/barrel təşkil edib ki, bu da ötən çərşənbə axşamına olan göstəricidən 0,16 dollar/barrel çoxdur.