Bakı Ağır Cinayətlər Məhkəməsində 2017-ci ildə Rusiyada "Lotu Quli" ləqəbli kriminal avtoritet Nadir Səlifovun yaxın adamı kimi tanınan Cabir Həsənovu qətlə yetirməkdə təqsirləndirilən, kriminal aləmdə "Yeraz Camal", "Piter Camal" kimi tanınan Camal Həsənovun məhkəmə prosesi başlayıb.

Milli.Az Trend-ə istinadən xəbər verir ki, hakim Siyavuş Hacıyevin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.

Daha sonra təqsirləndirilən şəxs saxlandığı Dövlət Təhlükəsizliyi Xidmətinin İstintaq Təcridxanasından Penitensiar Xidmətinin İstintaq Təcridxanasına köçürülməsini istəyib.

Hakim bildirib ki, hazırlıq iclasının qərarı zamanı bu məsələyə baxılacaq.

Prosesdə hakim bildirib ki, məhkəmə sənədləri dövlət ittihamçısına çatmayıb və buna görə məhkəmə təxirə salınmalıdır.

Bu səbəbdən məhkəmənin hazırlıq iclası aprelin 12-nə təyin edilib.

İttihama görə, "Yeraz Camal" Rövşən Lənkəranskinin qardaşı Namiq Canıyev, "qanuni oğru" Hacı Beyləqanski ilə birlikdə 2017-ci ildə İstanbulda "Lotu Quli"yə qarşı sui-qəsd etməkdə şübhəli bilinərək tutulub. Bir müddət sonra məhkəmə onları sərbəst buraxıb.

Rusiya mətbuatında gedən məlumatlara görə, "Lotu Quli"nin öldürülən adamı Cabir Həsənov Rövşən Lənkəranskinin qətlində iştirak edib. Bu səbəbdən də "Yeraz Camal" qisas məqsədilə Rusiyanın Sankt-Peterburq şəhərinə gedərək Cabir Həsənovu güllələyərək qətlə yetirib.

Camal Həsənov ötən il oktyabrında hüquq-mühafizə orqanların əməkdaşları tərəfindən tutulub.