Bir çox problemləri olan Səxavət Tursun verilişimizə onun üçün çətin görünən problemlərin həllinə nail ola bilmək üçün müraciət edib.

Bir az sonra həmin problemlər nədir deyəcəm. Amma əvvəlcə sizə Səxavət haqqında məlumat verim. Səxavət Vətən Müharibəsi iştirakçısıdır. Müharibənin 3-cü günündə döyüşə qatılıb. Ağdam və Ağdərənin azad olunması uğrunda gedən döyüşlərdə iştirak edib. Oktyabrın 9-da isə yaralanıb.

Bunlar müsahibim haqqında qısa məlumat idi. İndi isə problemləri haqqında danışaq. Deməli Səxavət yaralandıqdan sonra şəhadətləndirilməsi üçün Hərbi Həkim Komissiyasından keçib. Lakin ona hərbi xidmətə yararlı olması qərarı verilib. Səhhətində problemlərin olduğunu deyən Səxavət xidmətə yararlı olmadığını iddia edir. Buna görə də yenidən şəhadətləndirilmək istəyir. Digər problemləri isə maddi sıxıntılarla bağlıdır. Bu tam təmirsiz, quru divarlar arasında 5 nəfər daha yaşayır. Səxavətin qardaşları, onların ailəsi və anaları.

Evin şəraitsizliyi,qaz borcu,maddiyatsızlıq bütün bunlar ailəni sıxan problemlərdir. Bütün bu problemlərin həlli yollarına diqqət yetirək. Deməli,bizim müraciətimizdən sonra məsələyə aydınlıq gətirən rayon icra hakimiyyətinin şöbə müdiri bildirdi ki,ailənin ev problemini həll etmək üçün icra hakimiyyətində yetərli büdcə yoxdur.

Azəriqaz istehsalat birliyindən bildirildi ki, qazi Səxavət Tursunun mavi yanacağa olan borcu ilə bağlı ona mərhələli şəkildə ödəniş etmək imkanı veriləcək. O ki qaldı, əlillik təyinatı məsələsinə bu məsələnin həlli üçün də müvafiq quruma müraciət etmişik. Yəni, Müdafiə Nazirliyinə. Müdafiə Nazirliyi qısa zamanda bizə məlumat verərək bildirdi ki, əgər vətəndaş əsəb sistemində müəyyən problemlərin olduğunu düşünürsə ruhi əsəb dispanserində stasionar müalicə aldıqdan sonra xəstəxanadan aldığı epikriz də daxil olmaqla müvafiq sənədləri təqdim etməklə yenidən hərbi həkim komissiyasından keçərək şəhadətləndirilə bilər. Real TV

Milli.Az