“Əvvəla onu xüsusi olaraq vurğulayaq ki, Tovuz döyüşləri ordumuzun qəhrəmanlıq, xalqımızın birlik nümayişi, erməni ordusu üzərində qələbələrin davamı, böyük Qələbəmizin başlanğıcı idi.

Bu sınaq xalqımızı birləşdirdi, ruhlandırdı, intiqam hissini alovlandırdı. Tovuz döyüşləri qəhrəmanlıq səlnaməsidir, Azərbaycan tarixinə qızıl hərflərlə yazılan və daim fəxrlə anacağımız hadisədir. Məhz bu müharibədə, 4 gün davam edən Tovuz döyüşlərində Ermənistanın növbəti hiyləsi, növbəti planı iflasa uğradı. Azərbaycanın beynəlxalq kommunikasiya xətlərinin – Bakı-Tbilisi-Ceyhan neft kəmərinin, Bakı-Tbilisi-Ərzurum qaz kəməri, Bakı-Tbilisi-Qars dəmir yolunun Tovuz rayon ərazisindən keçən hissəsini ələ keçirməklə ölkəmizin dünyaya çıxışını bağlamaq niyyətində olan Ermənistanın istəyi ordumuzun şücaəti, qəhrəmanlığı sayəsində boşa çıxdı”. Bu fikirləri SİA-ya açıqlamasında Milli Məclisin deputatı Aydın Hüseynov deyib.

Milli Məclisin deputatı bildirib ki, Ordumuzun birinci Qarabağ müharibəsindən sonra ilk uğurlu əməliyyatı Aprel döyüşlərində Lələtəpədə və Şərur rayonunun Günnüt kəndində olmuşdusa, Tovuz döyüşlərindəki əməliyyatlarda Azərbaycan ordusunun əsgər və zabitləri bir daha qələbənin uzaqda olmadığını qətiləşdirməklə yanaşı, "qüdrətli", "yenilməz" Ermənistan ordusu mifini də darmadağın etdilər: “Bütün dünya bir daha əmin oldu ki, üstündən 28 il keçməsinə baxmayaraq Azərbaycan xalqı haqqı olanı, torpaqlarını geri almaq, suberenliyini bərpa etmək gücündə və istəyindədir. Heç bir hərbi-siyasi güc Azərbaycan Ordusunun əməliyyatlarını durdurmaq, yolundan sapındırmaq gücündə deyil. Tovuz döyüşləri bir daha göstərdi ki, Azərbaycan Ordusu düşmənin hər cür təxribatlarının və gözlənilməz hücumlarının qarşısını qətiyyətlə almaqda çətinlik çəkmir. 100-dən çox hərbçisi və onlarla hərbi obyektləri məhv edilən Ermənistan silahlı bölmələrinin şəxsi heyəti hətta səngərləri qoyub qaçdı. Döyüşlər zamanı bir neçə gün ərzində yüzlərlə yaralı və ölü daşıyan ermənilər itkilərdən dəhşətə gəldilər. Fitnəkar, dail işğalçılıq siyasəti yürüdən Ermənistan cəbhədəki ağır uğursuzluğunu xalqdan gizlədərək, hərbi rəhbərliyin doğru olmayan məlumatlarını yayırdı. Xalqımız bu döyüşlərdə mərd, vətənsevər oğullarını - general-mayor Polad Həşimovu, polkovnik İlqar Mirzəyevi, mayor Namiq Əhmədovu, mayor Anar Novruzovu, baş leytenant Rəşad Mahmudovu, gizir İlqar Zeynalovu, gizir Yaşar Babayevi, baş çavuş Vüqar Sadıqovu, çavuş Elçin Mustafazadəni, çavuş Nazim İsmayılovu, baş əsgər Elşad Məmmədovu və əsgər Xəyyam Daşdəmirovu itirdi. Allah bütün şəhidlərimizə rəhmət eləsin. Amma bu şəhidlər həm də öz ölümləri ilə minləri, milyonları ayağa qaldırdılar, Vətən uğrunda ölüm-dirim savaşına çıxmağın vaxtı gəldiyini insanlara çatdırdılar. Azərbaycan Respublikasının Prezidenti, Ali Baş Komandan İlham Əliyev həmin günlər bir daha bildirdi: "Biz fəxr edirik ki, Azərbaycan xalqı, Azərbaycan torpağı belə övladlar yetişdirib". Tovuz döyüşləri ölkəmizdə xalq və Prezident, xalq və ordu birliyinin yenidən təcəssümünə çevrildi. Azərbaycan Ordusu bir daha göstərdi ki, Ermənistan ordusu onun gücü qarşısında aciz və zəifdir”.