Bu gün Antalyada çox önəmli bir görüş keçirilir. Ukrayna tərəfi hələ müharibədən əvvəl Rəcəb Tayyib Ərdoğanın vasitəçilik təklifini heç bir ön şərt olmadan qəbul etdiyini bildirib. Lakin Rusiyanın Ukraynanın müqaviməti və Qərbin ağır sanksiyaları nəticəsində müzakirə qapısını araladığını deyə bilərik.

Bu sözləri Axar.az-a açıqlamasında Ankara Hacı Bayram Vəli Universitetinin professoru Kürşad Zorlu deyib. Professor tərəflərin öz tələbləri olduğunu qeyd edib:

“Kremldən verilən açıqlamalarda Putinin öz tələblərindən geri addım atmayacağı qeyd olunsa da, Belarusda tərəflərin görüşünün üçüncü raundunun da baş tutması əslində masanın varlığını göstərir. Rusiyanın Türkiyənin müşaiyəti ilə Ukrayna ilə xarici işlər nazirləri səviyyəsində görüşə razı olması rəsmi Moskvanın müzakirələrə önəm verdiyini göstərir.

Makron və Bennettin vasitəçiliklə bağlı axtarışda olduğu hazırki mərhələdə tərəflərin liderlər səviyyəsində olmasa belə, nazirlərin üz-üzə görüşü üçün Türkiyəni seçməsinin çox vacib beynəlxalq diplomatik əhəmiyyəti var. Hazırda ölkə başçılarının üz-üzə görüşü müharibədə real vəziyyətə görə mümkün deyil. Kuleba Antalyaya gəlməmiş “Bizim mənfəətimiz atəşkəsin olması, torpaqlarımızın qurtarılması və humanitar məsələlərin həllidir. Mən bu müzakirələrə güclü bir mövqe ilə gedirəm” sözlərini işlədib. Zelenskinin də daha mülayim açıqlamalar verməyə başlaması isə ölkənin ərazi bütövlüyünün neytrallıq statusundan daha önəmli olduğunu göstərir. Ukraynanın neytral status qarşılığında Rusiyadan çoxlu tələbləri olacaq. Rusiya isə tərəfsizliyin rəsmi bir status kimi təsdiq olunmasından başqa Donbas və Krımın rus torpağı kimi qəbul edilməsini istəyir.

Sözügedən tələblərin hansısa bir formada tarazlaşdırılması mümkündürmü? Buna cavab vermək çətindir”.

Kürşad Zorlu eyni zamanda humanitar məsələlərdə razılıqların əldə edilə biləcəyini daha mümkün hesab edib:

“Fikrimcə, üçtərəfli görüşdə humanitar dəhliz və yardımlar haqqında daha qəti bir razılıq beynəlxalq ictimaiyyətə elan edilə bilər. Antalya görüşü həm də tərəflərin bir-birini test edəcəyi görüşdür. Bəlkə də hazırki görüş nəticəsiz bitə bilər, ancaq əsas məsələ atəşkəsə gedən yolu açan görüşlərin davamlı hala gəlməsidir”.