Biz daha çox Kiyevdə, digər şəhər və yaşayış məntəqələrindəki müqavimətə, şəhər döyüşlərinə diqqət yetiririk. Ancaq Ukraynada zamanla geniş ərazilərə yayılma ehtimalı olan müqavimət və yeraltı həmlələr öz varlığını davam etdirmək üçün geniş fürsətlər verir.

Bu sözləri Axar.az-a açıqlamasında terror və təhlükəsizlik üzrə türkiyəli ekspert Abdullah Ağar deyib.

Ağar Ukrayna ərazisinin, meşələrinin və dağlarının sözügedən döyüş forması üçün uyğun olduğunu qeyd edib:

“Ukraynanın nəhəng, qaranlıq və dərin fıstıq meşələri, qara palçığı, qarmaqarışıq axar su bataqlıqları bu ölkənin Tora Borası ola bilərmi?” – sualının cavabı çox önəmlidir.

Ukraynada nəhəng meşələrin başında Çernobıl, Uqolsko-Şirokolujanski, Kusik və Marmaroş, Svidovets meşələri gəlir. Sadaladığımız meşələr həm də Avropanın ən böyük meşələridir. Qoverla ilə Ukraynanın ən hündür dağı Qara dağ (Çornaya qora - 2061 metr) bunun üçün son dərəcə əlverişlidir. Rumıniya ilə sərhəddəki Karpat dağları isə dağ bloku və sıx meşələr baxımından ölkənin ən yüksək ərazisidir. Bu bölgənin sərhəd xaricindəki ərazilərdən dəstək alma, yuvalanma, qaçış və başqa məsələlər üçün özəl xüsusiyyətləri var. Digər bir cavab axtarmalı olduğumuz sual isə budur: “Su keçidləri əngəllənmiş, palçıq və bataqlıqlardan qaçan rus ordusu yalnız havaya məhkum ola bilərmi?”