“Ölkə.Az”ın suallarını cavablandıran Seyidcahan siyasi fəaliyyətindən də söhbət açıb.

“Mən özüm YAP-ın üzvüyəm. Mənim fikrimcə, bütün partiyalar orada cəmləşir. Bütün millət, vətən orada birləşir. Düzdür, elə insanlar var ki, YAP partiyasının adına layiq hərəkət etmirlər. Necə deyərlər, hər bir ailədə olduğu kimi övladın yaxşısı da var, pisi də. Bu da ona oxşar bir vəziyyətdir”,- deyə o, qeyd edib.

Elza Seyidcahan digər partiyalardan ona gələn təkliflərdən də danışıb.

 “Mənə çox təkliflər gəldi. Ancaq mən düşünürəm ki, bütün partiyalar YAP-da birləşir. Musiqi dilində desək, bir harmoniya təşkil edir. Seçkidən əvvəl bir neçə müxalif partiyalardan namizədliyimi  oradan vermək təklif olundu. Ancaq mən namizədliyimi öz partiyamdan - YAP-dan irəli sürdüm. YAP bizə Ulu Öndərdən qalan, başımızın tacı sayılan mirasımızdır”.

Əməkdaşımızla söhbətində əməkdar artist bildirib ki, heç vaxt qarşısına qoyduğu məqsədindən əl çəkmir.

“Mən heç bir zaman məqsədimdən, əqidəmdən dönməmişəm. Mən seçkilərə xalqın istəyi ilə qatılmışdım. Əslində biz sənətkarlar xalq tərəfindən ömürlük millət vəkili seçilmişik. Ancaq belə seçkilərdə də seçilməliyik ki, hər zaman xalqın yanında olaq, onlarda ruh yüksəkliyi yaradaq. Onlar da fəxr etsinlər ki, bu cür gözəl vətəndə yaşayırlar və onların İlham Əliyev kimi prezidentləri var. Ona görə mən mübarizəmi sona qədər aparacağam. Xalqımızın məhəbbəti, sevgisi mənim qıc olmuş əllərimi açdı. Bəlkə də bəziləri sevindi ki, Elza xanım siyasətdən, musiqidən getdi, amalından məqsədindən uzaqlaşdı. Xeyr, Elza heç zaman amalından, qarşısına qoyduğu məqsəddən uzaqlaşmır, qoy sevinməsinlər. Mən buradayam, mübarizəmi qaldığım yerdən davam etdirmək üçün əlimdən gələn hər bir şeyi etməyə hazıram”, - deyə o, fikrini tamamlayıb.

Aparıcı Mətanət Əsədovanın ''Mən ikinci Zeynəbəm'' sözünə irad bildirib. 
O, verilişin qonaqları olan əməkdar artistlər Firuzə İbadova və Cavanşir Məmmədova, müğənni Şəbnəm Tapdığa və İlham Mirzəyevə üzünü tutaraq:
''Sizcə Mətanətin özü haqqında belə bir söz deməsi nə dərəcədə doğrudur? Bu sözü müğənniyə xalq deməlidir. Müğənni özü yox. Həmin müğənni Zeynəb xanımın gördüyü işlərin yarısını görsün sonra danışsın'',- deyib. 
Müğənni Cavanşir Məmmədov isə bu barədə öz fikrini bildirərək ''Zeynəb Xanlarova elə bir sənətkardır ki, onu hansısa müğənni ilə müqayisə etmək, efirdə müzakirə etmək düzgün deyil'',- sözlərini söyləyib.

Bu barədə APA-ya xalq artisti özü məlumat verib.

Onun sözlərinə görə, nəzərdə tutulan 4 günlük solo konsertin hər birində 3000-dən çox tamaşaçının iştirak edəcəyini nəzərə alaraq Azərbaycanda və bütün dünyada aparılan profilaktik tədbirlərə və Ümumdünya Səhiyyə Təşkilatının (ÜST) yaydığı tövsiyəyə uyğun olaraq bu qərarı verib: “Bu tipli kütləvi tədbirlərdə belə virusun yayılma təhlükəsini nəzərə  aldıq. Bizim üçün insanlarımızın, sevimli tamaşaçılarımızın səhhəti ilə bağlı məsələlər vacib olduğu üçün həyata keçirilən profilaktik tədbirlərə dəstək göstərmək qərarını verdik”.

Xalq artisti Röya solo konsertinin yeni tarixi barədə əlavə məlumat veriləcəyini bildirib.

Mart ayındakı konsertə bilet almış şəxslər yaranmış suallarla əlaqədar şəhərin müvafiq kassalarına müraciət edə bilərlər.

"Ölkə.Az" Vüsalə Balayevanın təqdimatında "Şoumız" rubrikasını (5-ci say) təqdim edir.

Deyirəm, hava da deyəsən yerini səhv salıb, qışda yaz oldu, elə ki mart ayı girdi, başladı qış abu-havasını bizə hiss etdirməyə. Uzun sözün qısası, görək keçən həftə şou-biznes camiəsində kim qışı yaşadı, kim bahar havası ilə bizi feyziyab etdi.

Keçən həftə Xalq artisti Məleykə Əsədovanın əldə etdiklərini öz zəhməti ilə qazanması haqqında etdiyi açıqlama gündəmə bomba kimi düşdü. O, üzünü millətə tutub dedi ki, məni niyə qınayırsız ki, 3 milyon manatlıq villam var? Mən hər bir qəpiyimi öz alın tərimlə qazanmışam, tələbəlik vaxtında hamı kinoya gedib, sevgilisi ilə əl-ələ gəzəndə, mən rayonda toylara getmişəm, pul qazanmışam. Hazırki var-dövlətimi əldə etmişəm.

Deyirəm, sizin işiniz – gücünüz yoxdur oturub xalxın malını sayırsız?  Pakizə xala da dünən mənə deyir ki, gör Məleykə xanım yenə toya gedir, nəvəmə toy edəcəm, məclisə dəvət edim.

Stilist Anar Ağakişiyev şəxsi həyatı ilə gündəmə gələn şou əhlini qınayıb. Deyir bu nədir canlı efirdə boşanırlar, evlənirlər, ailə həyatını oyuncaq ediblər. Haqq sözə nə deyəsən, kişi düz deyir.

Natəvən Həbibi də repçi həyat yoldaşı Dado ilə 3 həftədir küsülüdür. Bunu mən demirəm ha, efir deyir. Son trendə uyğun olaraq, o da bunu canlı efirdə açıqlayıb. Arzu edirəm ki, tezliklə barışsınlar. Hərdən düşünürəm ki, bu borc istəmələr, incikliklər olmasaydı görəsən efirdə göstərməyə mövzu tapardılar?

Bu qışın bəlası koronavirus da vallah bizdə ağıl qoymayıb. İnsanlar bu xəstəliyə görə artıq “maç-maç, quc-quc da” eləmirlər. Bunu mən demirəm, Teymur əmi də bunu efirdə açıqlayıb.

“Bu gün “maç-maç, quc-quc” yoxdur. Öpüşmək qəti olmaz. Görüşdük, vəssalam, qurtardı getdi”.

Statistika yaşlı adamların bu virusa yoluxmasının daha ağır nəticələr verdiyini açıqlayıb. Axır ki, Teymur əmi də boynuna aldı ki, qocalır.

Sən demə Xatunla Rüfət Axındovun ifa etdiyi “Sənə görə” mahnısı erməni mahnısı imiş. Hətta klipləri oxşarlıq təşkil edən bu ekran işi hələ də müəmma olaraq qalır. Vallah, bilmirəm bu həqiqəti kim ortaya çıxarıb, ancaq onu bilirəm ki, ermənilərin əlinə yaxşı zurna vermişik. İndi bildikləri qədər üfləyib, dünyaya səs salacaqlar. Bu axı onların sağ əllərinin sol peşəsidir. Nə deyim, Allah bizi sapı özümüzdən olan baltalardan qorusun. 

Xatunun başı bir bəladan qurtarmamış, qıza bir şər də atıblar. Ona deyirlər ki, sən ombana silikon qoydurmusan. O da daş atıb, başını tutur ki, tövbə yalandır, anadangəlmə beləyəm, ombamda heç bir silikon zad yoxdur.

Tolik yenə efirdə qalmaqallı açıqlama edib. Sən demə estrada müğənnilərimiz xanəndə qızların yanında toya getməlidir.

O, xanəndə qızların Rusiyada pullu “daydaylar”la "nə hoqqalardan" çıxdığının şahidi olub. Bu yerdə deyiblər e “suyun lal axanı, adamın yerə baxanı”.

Əli Mirəliyev də bəzi müğənnilərin nə hoqqadan çıxdığını bilmək üçün bu yaşlı vaxtında özünə əziyyət verərək gecə klublarına gedib. Ay Əli müəllim, bu sənə lazımdır, kimlərə görəsə özünə bu zülmü verirsən?

Bu yerdə göydən 3 alma düşdü, biri bu müğənniləri qınayanlara, ikisi də şou-biznes nümayəndələrinə ki, yeyib qüvvətli olsunlar. Yoxsa, bu ağızları bağlaya bilməzlər.

Yadımdan çıxdı, o, Şotlandiyada məhkəmə iki qoyunu şapalaqlayan fermerə 550 funt sterlinq cərimə kəsmişdi, o işin axırı necə oldu?

O, toy günü çəkilən fotosunu “İnstagram” səhifəsində sevənləri ilə paylaşıb.

Xalq artisti fotosunu şərh edərək, bəzi insanlara mesajını çatdırıb.

“Əziz dostlar bu Ədalə müəllimlə bizim toy şəklimizdir. Ortada Bakıda böyümüş, Qarabağı heç görməmiş və könüllü olaraq müharibəyə gedib, Ağdamda şəhid olan xalamız oğlu Elçindir. Arxada dayanan qadın da bir başqa qohumumuzdur. Onun da oğlu Azər Naxçıvanda şəhid olub. İndi şəhidlərimizə baxıb düşünək. Onlar şirin canlarını qurban verdilər. Biz bu günkü cəmiyyəti yaratdığı müğənnisi, mədəni irsi, həmvətənlərini təhqir edən, bir-birinə qənim kəsilib, ətini didən, bir-birinə şər böhtan atan, ayağının altını qazan bir cəmiyyət olduq. Azad, müstəqil və bu müstəqilliyi, söz azadlığını sui – istismar edən bir cəmiyyət yaratdıq. Yavaş-yavaş mənəvi dəyərləri yox etməyə çalışan insanların cəmiyyətinə çevrilirik. Ruhları şad olsun”.

"Ölkə.Az"  Vüsalə Balayevanın "613-cü qurban " hekayəsini təqdim edir.

-Ssssss. Sakit, ağlama, sakit, sus, sus. Allah xətrinə sus. Gözəl balam, sus... 

Sonra isti nəsə hiss etdim, alnımdan axdı deyəsən - bu isti nə idi belə? Qaçıram ayaqlayın, qaçıram. Hara qaçıram, özüm də heç bilmirəm. Qızım - balaca quzum qucağımdadır. Qaçırıq. Hamı qaçır. Get-gedə sıralarımız azalır. Bir-bir azalırıq. Kiməsə güllə dəyir. Yıxılır, al-qana bulanır. Əlimi uzadıram, qışqırıram – kömək edin, kömək edin... 

Hamı qaçır... Deyəsən, son dəfə mən otaqdaydım, quzuma lay-lay oxuyurdum: 

Lay-lay dedim yatasan, 

Qızılgülə batasan, 

Lay-lay balam, quzum lay-lay...

Atəş səsləri, güllə-baran. Ay Allah, bu nədir? Qiyamət qopur, dünyanın sonudur? Qaçırıq, evdən çıxıram. Quzu balamı yataqdan götürüb qaçıram. Gücüm ancaq əlimə keçən şala çatır. Balamı bükürəm, bağrıma basıram. Heç nə gözümə görünmür, heç nə. Ancaq balamı qurtarım, 15 il həsrətini çəkdiyim balam... 

Yanaqlarım donur, əllərim donur. Gülzarım görəsən donmur? Əynimdəki jaketi çıxarıb bükürəm şalın üstündən. Birdən soyuq olar balama... 
Qarşıdan ermənilər keçir. Qonşu arvad “qızım kola gir, kola gir, ermənilərdir, gir, gir”. 

Tikanlı kolluğa girirəm. Tikanlar əllərimi, üzümü cızır. Təki balamı incitməsin. Hər tərəfim qanayır. 

Gülzar ağlayır. Var gücümlə əlimlə ağzını tuturam. 

-Ssssss. Sakit, ağlama, sakit, sus, sus. Allah xətrinə, sus. Gözəl balam, sus... 

Yenə qaçıram. Qarşıda çay var, ayaqyalınam. Suya girdim. Ay Allah su buz kəsir ayaqlarımı. Hiss etmirəm ayaqlarımı. 

Ayaqlarım hardasa kəsilib, qan su kimi axır. Amma hiss etmirəm, qaça bilmirəm. Gülzarımın səsi gəlmir, yatdı deyəsən. Şalı açıram, gözləri niyə açıqdır? – Gülzar, Gülzar. Öz əllərimlə sakit olmaq üçün balamı boğmuşam. Balamı öldürmüşəm. Qatil ana, qatil.

Balamı son dəfə alnından öpürəm. Balam bumbuzdu. Hanı sənin isti nəfəsin? 

Çayın qırağında balamı basdırmaq istəyirəm, qonşu qadın məni dartışdırır – Qoy, o onsuz heç nə hiss etmir. Yaxınlaşırlar. Balamı qoyub üzərinə qar töküb gizlədirəm. Beynim, düşüncəm donub. Heç nə düşünə bilmirəm. Elə bil yuxudayam. Balama ağlaya bilmirəm, görəsən göz yaşlarım da donub? 
Qaçırıq... Birdən...Birdən arxadan mənə nəsə dəyir, biri ürəyimə, biri ayağıma. Ağrı, şiddətli ağrı nəfəsimi kəsir. Sonuncusu başıma dəyir... O güllədən sonra heç nə hiss etmirəm, ağrılarım keçir. Üzü üstə yıxılıram. Qar görürəm ətrafda. Kimsə mənə yaxınlaşır. Əvvəl mənə 2-3 dənə təpik çəkir, hiss etmirəm heç nə. Məni kürəyi üstə çevirir. Yanındakına nəsə deyir. Gülürlər.

Göy üzü necə gözəldir. Səma, sonsuz səma... Yanımdan kimlərsə qaçır. Düz yanımda qan gölməçəsi var. Qaçanların ayaqları ora çırpıldıqca üzümə qan sıçrayır. Heç nə hiss etmirəm. 

Qışqırıq...qışqırıq. Qonşumuz Ayazı kəndirlə ağaca bağlayıblar, gözünün önündə arvadını, qızını yerə uzadıb soyundurublar. Qaldırırlar, lüt qaçırdırlar. Mırıqdış dığalar gülürlər. Ayaz şir kimi nərildəyir “namussuz ermənilər, aç əlimi, gör səni neyləyirəm. Qorxaqlar, alçaqlar”. 

Ayazın gözü qarşısında arvadına, qızına təcavüz edirlər, dik, Ayazın gözünə baxıb gülə-gülə. 

Üzərinə benzin töküb diri-diri yandırırlar. Heç səsi də çıxmır. Sevinir bu namussuzluqdan ölüb gedir. 

Hamilə qadın qaçır, haqlayırlar onu. Qarnını kəsib körpəni çıxardırlar. Ananın başın kəsirlər. O da mənim kimi ağrını hiss etmir indi.
Üzümü səmaya çevirirəm. Hava açılır. Səma necə də gözəldir. Yanımdakı əsgərin meyidinin baş dərisini soyurlar, gülürlər. Sanki həzz alırlar.
Ana, ana. Kimsə çığırdı. Kimdir o? Səs necə də tanışdır. Vahiməli bağırtı - Can balam, can. Tükəzban xala - bizdən iki məhəllə aşağıda qırmızı evdə yaşayan qadın. Yadıma düşdü. Bir oğlu var, Teymur. 2 ay bundan qabaq evləndirmişdi. 20 yaşlı cavan oğlandı. 

Tükəzbanın gözü qarşısında diri-diri onu iki hissəyə böldülər. O, indi mənim kimi heç nə hiss etmir.

Teymurun ayağının birini bədənindən ayırdılar. Tükəzbanı çayın qırağında oturdublar. Balasının qopmuş ayağı ilə üzünə, başına vururlar. Bala qanına bulanır üzü. Qadın ağlamır, var-gücü ilə qışqırır. Birdən qışqırıq möhkəm qəhqəhəyə çevrilir. Aman Allah, bala qanından qadın divanə olur. Təpikləri ilə vurub qadını suya atırlar. Güllə səsləri, gülüş kəsilir. 

Gördüyüm yalnız göy üzü, səmadır. Daha ağrılara, acılara baxmıram. Mən azadam, heç nə hiss etmirəm. Qulağıma qışqırıqlar, gülüşlər, güllə səsləri gəlir. 

İki gündür deyəsən burdayam, göyə baxıram. Göydə helikopter uçur. Sevinirəm bizimkilər gəlir deyəsən. Sevinirəm ürəyim, ürəyim...yox, ürəyim döyünmür. Hər şey üçün çox gecdir. Hayqırmaq istəyirəm. Gecdir, gecdir, siz çox gecikmisiniz. 

Səmaya baxıram... Mən insan idim, bir gecədə Xocalıya çevrildim. Mən Xocalıyam... 

Artıq heç nə hiss etmirəm. Mən azadam...Mən Xocalıyam...

                                                                                                                             Xocalı 1992-ci il 26 fevral...

"Ölkə.Az" Vüsalə Balayevanın təqdimatında "Şoumız" rubrikasını (4-cü say) təqdim edir.

Xalq artisti Faiq Ağayev Flora Kərimovanın heç zaman unudulmayacağını deyib. Baxmayaraq ki, uzun müddətdir iki Xalq artistinin arasından “qara pişik” keçib, amma yenə də Faiq şəxsi münasibətlərini bir kənara qoyub, əsl sənətə qiymət verib. Burada məncə, Ağayevə böyük bir “Əhsən” düşür.

Bundan başqa Faiqin Xalq artisti Brilliant Dadaşova ilə də türklər demiş arası “limoni”dir. Faiq Ağayev onun tezliklə unudulacağını açıqlayıb. Nə deyək, hər şeyi zaman göstərəcək. Dadaşovadan söz düşmüşkən, onun şortikdə etdiyi fotosessiyaya baxdım, necə deyirlər, igidi öldür, haqqını yemə. Xalq artisti yaşına görə çox ideal biçimdə qalıb. Nə düşmüsüz üstünə, “sən nənəsən, özünü cavan qız kimi aparma”. Bəlkə xalq artisti rusiyalı, 60 yaşında “İnstagram” fenomeninə çevrilən nənəni özünə ideal seçib. Bağ onun, bağça onun, istəyər meyvələri satar, istəyər bağışlar. Lap kefinə düşər, bağı satıb "novostroyka"dan üç otaqlı 200 kvadratmetrlik mənzil alar.

O dəfə də qeyd etdiyim kimi, hər həftə “Şoumız”ın baş qəhrəmanını seçəcəm. Bu dəfə qalibimiz Manaf Ağayev olub. Elə həftə təzə başlamışdı ki, Ağayev bombanı partlatdı. Deməli, Rövşanə Ağasəfqızının qonağı olan ifaçı əvvəl onu pərt etməklə özfəaliyyətinə başlayıb. Onu bayağı adlandıran aparıcıya, canlı efirdə “səni də hamı sevmir” kəlməsini işlədib. Hə, elə bilirsiniz baş qəhrəman ona görə elan olunub? Yanılırsınız.  Sonradan isə Manaf müəllim deyib ki, bizə sənət yox, çörək lazımdır. Verilişin digər qonağı olan bəstəkar Nadir Əzimovun “bəs zövq?” məsələsində isə Azərbaycan xalqının zövqsüz olduğunu iddia edib. O, bəstəkara bildirib ki, “zövqlər qurtarıb”.

Təklif edirəm ki, papağımızı qoyaq qarşımıza düşünək. Bəlkə elə Ağayevin dediklərində günahkar bir balaca da özümüzük. Bəlkə elə biz dəyərimizi, Üzeyirlə, Qarayevlə, Sabitoğlu ilə soyuq məzara basdırmışıq? Elə olmasaydı, “Google”da Üzeyir adını yazdıqda, Üzeyir Mehdizadənin adı Üzeyir Hacıbəyovdan əvvəl çıxmazdı.

Elə istəyirdim deyim ki, sözüm elə burada bitsə yaxşıdır, yadıma Manafın həftə ərzində etdiyi o biri “qəhrəmanlığı ”   düşdü. Bir qalmaqal unudulmamış, Manaf yenə öz “ampluasında” çıxış etdi. Dedi ki, “qadının bir kəlməyə görə başını kəsərəm”. Dünya sivilizasiyasında məşhurlar qadına şiddətə son adı altında birləşəndə, biz hələ də efirdə çıxıb millətə "örnək verib", "baş kəsirik". Bundan əlavə, o, bildirib ki, heç vaxt üzr istəməyib. Ancaq sonradan məlum oldu ki, Manaf üzr də istəyib, dediyi sözlərə görə peşman da olub. Ancaq Ağayev xalqın qarşısında deyil, çağırıldığı Bakı Şəhər Baş Polis İdarəsində üzr istəyib.

O gün oxudum ki, İbrahim Tatlısesi oriental rəqqasə məhkəməyə verib. O, iddia edib, 20 yaşı olanda “imperator” ona qarşı seksual təcavüzdə “bulunub”. Deyirəm, öz şou biznesimizə min şükür e. Biz belələrindən uzağıq. Heç gör Aygün Kazımova bir zamanlar verdiyi "3000 kişi ilə yatmışam" açıqlamasındakı bircə kişiyə qarşı hansısa iddiada bulunurmu? Bulunmaz, abi!

Bizdə olsa-olsa canlı efirdə müğənniyə elçi düşmək olur. O da əlli yaşdan sonra. Məsələn, Tolik deyəsən yaman Mənzurəni ərə vermək istəyir. Elə olmasaydı, qız efirə gələn kimi bütün adaxlı nümayəndələri efirin "qaynar xətt"ini “dağıtmazdılar”. Tolik təklif edir ki, nə olsun ki, alınmayıb, bu o demək deyil ki, yenə də olmayacaq. Mənzurə isə canlı efirdə ərə getmək istəmədiyini, efirə anasının baxdığını bildirib.

Əməkdar artist Sevinc Sarıyeva isə bildirib ki, kişi müğənniləri yanlarında apardıqları qadın ifaçılarını satırlar. Hətta iş o yerə gəlib çıxıb ki, onlar, yəni kişilər qadınları açıq geyinməyə belə məcbur edirlər. Sonda ifaçı bildirib ki, “deyirəm və sözümün arxasında da dururam”.

Vallah, bu yerdə nə deyək, biz qulaq günahkarıyıq, intəhası, burada mənə bir məsələ maraqlıdır. Məgər qadın ifaçılar əşyadırlar ki, onları satmaq olsun? Ağılları var, başları var. Kimə lazımdırsa, elə özü-özünü satar da. Makler nəyinə lazımdır ki, kiməsə də faiz versin?

Rəvayətə görə, cənnətdə 2 kreslo var. Orada axıra qədər mehriban dolanan qaynana ilə gəlin oturacaq. Xalq artisti Gülyanaq Məmmədova o kresloda oturmağa namizəddir. Deməli, ifaçı canlı efirdə qaynanasının qarşısında baş əyərək, “ana, səni sevirəm” deyib. Allah mehriban etsin.

Dünyaca məşhur rejissor Stiven Spilberqin qızı porno aktrisa olmaq istəyir. Yuxarıda da qeyd etdiyim kimi bizim şou biznes aləmi “toya gediləsidir”, gör dünya necə “korlanıb”. Bizdə olsa Eldar Qasımov kimi çalma taxıb, Şahruk Xan olmaq istəyən olar. Yaxşı ki, belədir. Ona görə, gəlin onları şou-biznesimizi qoyaq toy lampası kimi başlarına fırlanaq. Yeri gəlmişkən, Eldardan bir balaca nigaranam. Çoxdandır saçının rəngini dəyişmir. Birdən uşağın əli aşağı düşər, xəbərimiz olmaz. Sonra Avropada biabır olarıq ki, o boyda "Eurovision" qalibi 5 manat verib bir qab "kraska" alıb başını rəngləyə bilmir.

Elə ki, Moskvada havalar soyuyur, Rəqsanə başlayır “İnstagram”da fəallaşmağa. Paylaşdığı fotolarla gündəmi mülayim havalara bürüyür. Ancaq izləyiciləri yazığa “gün verib, işıq vermirlər”, o da fotolarına olan şərh bölümünü bağlayır.

Deyirəm nə yaxşı ki, o vaxt televiziya icad olunub. Yoxsa bu şou-biznes nümayəndələri məsələlərini harada həll edərdilər. Bu yaxınlarda canlı efirdə dava düşüb. Sən demə, müğənni Aynur Dadaşova şairə Nazilə Səfərlinin müəllifi olduğu mahnını ifa edib, ancaq pulunu verməyib. Nazilə də eləmə tənbəllik, məsələni canlı efirdə aç, tök. Olanlar da elə bundan sonra olub. Əsəbdən rəngi-ruhu saralan ifaçı, ödənişi çoxdan etdiyini, Nazilə isə pulu almadığını bildirib. İşin əsli isə belədir ki, sən demə bəstəkar Ruslan Səfəroğlu ödənişi Aynurdan alıb. Sadəcə Səfərlinin payını (söhbət pul payından gedir ha) verməyə unudub. Statistikaya görə, dünyada hər 10 nəfərdən biri Altsheymer xəstəsidir. Allah şəfa versin.

Əməkdar artist Rəhman Rəhmanov əməliyyat olunub. Şükür, sənətkarın vəziyyəti yaxşıdır, bu barədə o, özü məlumat verib. Çox yaşayın, əsl incəsənət xadimləri. Heç olmaya sizin sayənizdə arada da olsa əsl sənət görə bilək, Manaf demiş zövqümüz pozulmasın.

Sən demə, Xalq artisti Naibə Allahverdiyeva tez-tez nəzərə gəlirmiş. Getdiyi məclislərdən gəldikdən sonra, halı dəyişir. Bunu nəzərə alan həyat yoldaşı onun üçün tez-tez üzərlik yandırıb, başına dolandırıb, kürəyinə vurur. Ancaq Xalq aristi özü, qətiyyən nəzərə inanmır.

Bu hadisəni qonşuluqdakı  Pakizə xalaya danışmışam. Neçə gündür qadın əsəbdən saralıb. Deyir, gör mənim başıbatmışım bir dəfə də olsa başıma eləcənə üzərlik demirəm, quru otdan zaddan nəsə fırladıb. Vallah, gərək heç danışmazdım, xalxın evinə dava saldım.

Deyir Nadir də axır ki, arzusuna çatır. Tezliklə evində toy çaldıracaq. Özüdə o, bəzi müğənnilər kimi kiminlə qohum olacağını gizlətmir, deyir qızın atası diplomatdır. Qız özü də Amerikada, Əlcəzairdə, Fransada yaşayıb. Burada rəhmətlik Nəsibə Zeynalova yadıma düşdü, deyir “Maşın-maşın cehizi var, gəlnimin ay gəlnimin”.

Deyir, Rusiyada kişi bişirdiyi yeməyi bəyənmədiyi üçün, arvadının qabırğalarını sındırıb. O, məsələ necə oldu?

Bir qrup azərbaycanlı Londonda yerləşən Ermənistan səfirliyinin qarşısında etiraz aksiyası keçiriblər. 

Aksiya zamanı xüsusilə Londonda yaşayan həmyerlilərimiz Nigar Abbasova, Ruslan Abbasov və onların 5 yaşlı övladı Xədicə Xocalı soyqırımını törədənləri qınayıb, müxtəlif şüarlar səsləndiriblər.

"Ölkə.Az"ın məlumatına görə, ifaçı bu barədə “Səhər-səhər” verilişində danışıb:

“Təkəm, darıxıram. İş olmayanda adam sıxılır. Deyirəm ki, elə olsun ki, yorğun gəlim yatım. Tək olanda çox darıxıram, elə bilirəm ki, nəsə çatışmır. Hər şey mənə mənasız gəlir. İndi istəyirəm ki, kimisə sevim, görürəm ki, qarşı tərəf mənlik deyil. Mənim tələblərimə cavab vermir. Mütləq hər bir qadının arxasında bir kişi olmalıdır. Hər işimi özüm edirəm, amma yenə də dərdimi danışmağa kimsə yoxdur. Ana, bacı, övlad var olsun, özü üçün. Ətrafında hər kəs var, amma baxırsan ki, tənhasan”. //lent.az