Bir neçə gündür “Azəristiliktəchizat”ın istilik tariflərini aylıq hər kv.m üçün 15 qəpikdən 22-25 qəpiyə qaldırmaq niyyəti olduğu barədə mediada və sosial şəbəkələrdə məlumatlar dolaşır.

Qurumun sədr vəzifələrini müvəqqəti icra edən İlham Mirzəliyevin tariflərin artırılmasına əhalinin razı olduğunu deməsi də müzakirə mövzusu olub.

Axar.az “Azəristiliktəchizat”ın bununla bağlı mövqeyini öyrənib.

Qurumdan verilən açıqlamada qeyd olunub ki, bu gün istilik tariflərinin artırılması gündəmdə deyil:

“Tarif artımı nəzərdə tutulmur. “Azəristiliktəchizat” eyni tariflə fəaliyyətini davam etdirir. Qurumun sədr vəzifələrini müvəqqəti icra edən İlham Mirzəliyev 15 apreldə keçirilən mətbuat konfransında gələcək fəaliyyətlərdən danışarkən digər tariflərlə fərqi müqayisə etdi, onlara nisbətən bu gün istilik tariflərinin aşağı olduğunu bildirdi. Bu səbəbdən təbii qazın ödənilməsində çətinliklər yarandığını qeyd etdi. Buna baxmayaraq, bir neçə dəfə dedi ki, tarif artımı gündəmimizdə deyil. Tarif Şurasına bununla bağlı müraciət olunmayıb. Çalışırıq ki, xərclərimizi optimallaşdırmaqla, sistemi modernləşdirmək, yenidən qurmaqla, daha səmərəli enerji effekti olan avadanlıqlar tətbiq etməklə enerji daşıyıcılarının maya dəyəri aşağı salınsın”.

Açıqlamada həmçinin qeyd olunub ki, Xətai rayonunda məhəllədaxili qazanxanaların tikintisi məsələsi hazırda gündəmdədir:

“Bu məsələ hazırda müzakirə olunur, layihələr üzərində işlənilir. Çox güman ki, bu il zəruri addımlar atılacaq”.