İşğaldan azad edilən rayonlarımızda torpaqların kənd təsərrüfatı üçün yararlı hala gətirilməsi ilə bağlı işlər həyata keçiriləcək.

Bunu Axar.az-a Kənd Təsərrüfatı Nazirliyinin işğaldan azad edilən torpaqlarımızda kənd təsərrüfatının inkişaf etdirilməsi ilə bağlı fəaliyyət planı barədə danışan Aqrar Tədqiqatlar Mərkəzinin (ATM) direktoru Firdovsi Fikrətzadə deyib. O bildirib ki, fəaliyyət planına əsasən torpaqlar təyinatına uyğun olaraq müəyyənləşdiriləcək və əhalinin istifadəsinə veriləcək:

“İşğaldan azad olunan ərazilərimizdə ilk növbədə meliorasiya və irriqasiya sistemləri qurulmalıdır. Bununla paralel olaraq əkin, örüş, otlaq və s. təyinatlarına uyğun olaraq torpaqların uçot sistemi yaradılacaq. Bundan sonra torpaqların orada yaşayan insanların istifadəsinə verilməsi üçün müvafiq mexanizm qurulacaq. Həmçinin torpaqların əkib-becərilməsi üçün kənd təsərrüfatı texnikasının təminat sistemi yaradılacaq. Buna görə nazirliyin Aqro Servis xidməti ilə yanaşı, həm də özəl sektor stimullaşdırılacaq”.

F.Fikrətzadə deyib ki, dövlətin verdiyi dəstək hesabına gübrə, toxum və s. təchizatın özəl sektor tərəfindən həyata keçirilməsi mexanizmi bu regionlarda da təşkil ediləcək:

“Bununla paralel olaraq heyvandarlıq təsərrüfatının qurulması üçün müvafiq dəstək mexanizmi yaradılacaq. Oradakı fermaların bərpa olunmasına dəstək mexanizmi yaradılacaq. İstehsal olunmuş məhsulların tədarük şəbəkəsi formalaşdırılacaq. Xüsusilə regionun spesifikasına uyğun olaraq, süd, üzüm emalı müəssisələrinin yaradılmasının dəstəklənməsi də hədəflənən məqsədlərdən biridir. Həmçinin fəaliyyət planında nəzərə almalı olduğumuz məsələlərdən biri də işğal olunmuş torpaqların sakinlərinin bəzilərinin kənd təsərrüfatı fəaliyyətindən uzun müddətdir ki, uzaq olmasıdır. Bu insanlar öz vətənlərinə geri dönən zaman onların aqro-texnologiyalar üzrə bilik-bacarıqlarını artırmaq məqsədilə məsləhət informasiya xidmətləri qurulacaq. Həmçinin çevik modul peşə təlimi xidmətlərinin təşkil olunması da planlaşdırılan məsələlərdəndir”.