 |
 |
“AZE Medical Center” ödənişsiz tibbi aksiyalar həyata keçirəcək
Bakıda peşəkar həkimlərin fəaliyyət göstərdiyi və ən müasir avadanlıqlarla təchiz edilmiş “AZE Medical Center” özəl klinikasının açılışı olub. Açılış tanınmış səhiyyə adamları ilə yanaşı media və ictimaiyyət nümayəndələrinin də iştirakı ilə baş tutub. Klinikanın təsisçi və direktoru Zahir Babayev çıxış edərək qonaqları salamlayıb və bildirib ki, kollektivin ən böyük məqsədi sağlam gələcəyə gözəl və yüksək səviyyədə xidmət göstərməkdir: “Bunun üçün də biz, klinikamıza Azərbaycanın seçilmiş həkimləri ilə yanaşı, xaricdən də həkimlər cəlb etmişik. Belə ki, klinikamızda İrandan dəvət olunmuş 4 həkim fəaliyyət göstərəcək”. Z. Babayev deyib ki, “AZE Medical Center” Azərbaycanın bölgələrində ödənişsiz tibbi aksiyalar həyata keçirəcək: “Belə aksiyalardan birincisi isə yanvar ayının 26-da Ağsu rayonunda baş tutacaq. Növbəti mərhələdə isə Lənkəran rayonu nəzərdə tutulub. Bizim şüarımız da məhz belədir ki, “Biz sizin ayağınıza gəlirik!”.
Klinikanın direktoru daha sonra sözü səhiyyə mərkəzində vətəndaşlara xidmət göstərəcək iranlı Prof. Dr. uzman pediatr Ali Basirə verib. A. Basir çıxışında özünü vətənində hiss etdiyini bildirib. O, eyni dili danışan insanlarla işləmək və onlara xidmət göstərməkdən məmnunluğunu dilə gətirib. Daha sonra klinikanın baş həkimi və astma mərkəzinin direktoru Coşğun Məmmədli çıxış edib və klinikanın fəaliyyət istiqamətləri haqqında məlumat verib. O bildirib ki, “AZE Medical Center”da mamaginekologiya (buraya hamiləlik təqibi, qadın xəstəlikləri, sonsuzluğun müalicəsi, kolposkopiya və ginekoloji usm daxildir), mammalogiya, endokrinologiya, urologiya, andrologiya, pediatriya, terapiya və revmatologiya sahələri üzrə yüksək səviyyəli peşəkar tibbi xidmət göstərilir: “Pulmonologiya sahəsində astma mərkəzini önə çıxaracağıq. Astma və allergiya mərkəzi olaraq düşünürük. Məqsədimiz xalqımıza daha peşəkar və yenilikçi xidmət göstərməkdir. Arzu edirik ki, heç kim xəstələnməsin. Amma belə olan halda da peşəkarlara müraciət etmək lazımdır ki, xəstəlik klinikada qalsın”. Tədbirdə qonaq qismində iştirak edən Azərbaycanın tanınmış uroloq-androloqu Araz Bayramov da klinikanın açılışını əlamətdar hadisə kimi qiymətləndirib: “Əminəm ki, bu klinikada çalışan həkimlər və tibbi heyət vətəndaşlarımız üçün yüksək səviyyədə tibbi xidmət göstərəcəklər. Hər bir insanın sağlamlığı cəmiyyət və dövlətin üzərinə düşən zəruri funksiyalardan biridir. Bu cəhətdən belə klinikaların artması da ümumi inkişafın göstəricilərindəndir. Klinika ilə tanış oldum, çox yüksək keyfiyyətli tibbi avadanlıqlarla təmin olunub. Uğurlar arzulayıram”. Sonda tədbir iştirakçıları klinikanın imkanları ilə yaxından tanış olublar. Qeyd edək ki, Klinikada müxtəlif vaksinlərin müalicəsi ilə yanaşı pulmonologiya sahəsi də fəaliyyət göstərir ki, burada spirometriya(tənəffüs testi) və allergik rinitlərin şüa müalicəsi həyata keçirilir. Səhiyyə mərkəzi ən müasir avadanlıqlarla kardiologiya və nevrologiya sahələrində müayinə və müalicəyə də şərait yaradır. “AZE Medical Center”da keyfiyyətli müayinələr həyata keçirmək üçün müasir biokimya, hemotologiya, mikrobiologiya, immunologiya, serologiya və potohistologiya laboratoriyaları da fəaliyyət göstərir.
Klinika Nərimanov rayonunun İsmayıl Hidayətzadə küçəsində, 7 A ünvanında yerləşir.
Əlaqə nömrələri:
012 567 34 00
012 567 49 00
012 567 89 10
012 567 49 00
012 567 89 10
“Azərenerji” Açıq Səhmdar Cəmiyyəti “Reabilitasiya Proqramı” çərçivəsində digər elektrik stansiyalarında olduğu kimi, “Şəki” Elektrik Stansiyasında da “itirilmiş” gücün bərpa edilməsi istiqamətində təmir-bərpa işlər həyata keçirib.
“Qafqazinfo”nun məlumatına görə, 2018-ci ilin payızında qəbul edilən “Peabilitasiya Proqramına” qədər “Şəki” Elektrik Stansiyasında mövcud 10 aqreqatdan 2 ədədinin korpusu dağıldığından ümumiyyətlə işləmirdi, qalan 8 aqreqat isə kəsirlə fəaliyyət göstərirdi. Daha doğrusu “Şəki” Elektrik Stansiyasının qoyuluş gücü 87 meqavat olsa da, cəmi 40 meqavat güclə və tez-tez dayanmalar olmaqla işləyirdi. Korpusu dağılan 2 aqreqat da daxil olmaqla 10 aqreqatda təmir işləri aparılıb, ehtiyat hissələri dəyişdirildikdən sonra, indi stansiya 80 meqavatdan artıq güclə işləyir. Stansiyada 50 faiz və ya 40 meqavat “itirilmiş” güc bərpa edilməklə yanaşı, etibarlıq və dayanıqlıq təmin edilib.
Qeyd edək ki, “Azərenerji” ASC “Şəki” Elektrik Stansiyası ilə yanaşı ümumilikdə 6 ədəd modul tipli elektrik stansiyası da daxil olmaqla, 12 elektrik stansiyasında “itirilmiş” gücün bərpa edilməsi istiqamətində yenidənqurma və təmir işləri aparır. Bu günə qədər ümumilikdə 485 meqavat “itirilmiş” güc bərpa edilib.
2018-2021-ci illəri əhatə edən reabilitasiya proqramı çərçivəsində ümumilikdə 1000 meqavata yaxın “itirilmiş” gücün bərpa edilməsi nəzərdə tutulub.
Azərbaycan Respublikası Prezidenti İlham Əliyev Ağsu rayonunun Ağsu–Ağarx–Rəhimli–Qaradağ avtomobil yolunun tikintisi ilə bağlı tədbirlər haqqında sərəncam imzalayıb.
Sərəncama əsasən, altı min nəfər əhalinin yaşadığı doqquz yaşayış məntəqəsini birləşdirən Ağsu–Ağarx–Rəhimli–Qaradağ avtomobil yolunun tikintisi məqsədilə Azərbaycan Respublikasının 2020-ci il dövlət büdcəsinin dövlət əsaslı vəsait qoyuluşunun (investisiya xərclərinin) bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 17,4 milyon manatı Azərbaycan Avtomobil Yolları Dövlət Agentliyinə ayrılıb.
Azərbaycan Respublikası Prezidenti İlham Əliyev Ağcabədi rayonunda əkin sahələrinin və əhalinin içməli suya olan tələbatının ödənilməsi üçün subartezian quyularının layihələndirilməsi və qazılması ilə bağlı tədbirlər haqqında sərəncam imzalayıb.
"Ölkə.Az" xəbər verir ki, sərəncama əsasən, Ağcabədi rayonunun əhalisi 83682 nəfər olan 20 yaşayış məntəqəsində əkin sahələrinin və əkin üçün istifadə olunan həyətyanı torpaq sahələrinin suvarma suyu ilə təminatının yaxşılaşdırılması, habelə əhalinin içməli suya olan tələbatının ödənilməsi üçün 30 ədəd subartezian quyusunun layihələndirilməsi və qazılması məqsədilə Azərbaycan Respublikasının 2020-ci il dövlət büdcəsinin dövlət əsaslı vəsait qoyuluşunun (investisiya xərclərinin) bölgüsündə Azərbaycanın rayonlarında su təchizatının yaxşılaşdırılması məqsədilə subartezian quyularının qazılması üçün nəzərdə tutulmuş vəsaitin 2,1 milyon manatı Azərbaycan Meliorasiya və Su Təsərrüfatı Açıq Səhmdar Cəmiyyətinə ayrılıb.
Azərbaycan Mərkəzi Bankı bu günə olan valyuta məzənnələrini açıqlayıb.
"Ölkə.Az"ın məlumatına görə, yanvarın 7-nə olan rəsmi məzənnələr bülleteninə əsasən, ABŞ dollarının rəsmi məzənnəsi 1,7000 manat təşkil edir.
Manata nəzərən avronun məzənnəsi 1,9025 manat təşkil edir.
1 türk lirəsi 0,2849 manat, 1 rus rublu 0,0275 manat, 100 İran rialı 0,0040 manat, 1 gürcü larisi isə 0,5947 manatdır.
Dekabrın 29-da “Azərenerji” Açıq Səhmdar Cəmiyyətinin (ASC) 220/110/10 kV-luq “Müşfiq” yarımstansiyası istifadəyə verilib.
Azərbaycan Respublikasının Prezidenti İlham Əliyev tədbirdə iştirak edib.
“Azərenerji” ASC-nın prezidenti Baba Rzayev görülən işlər barədə dövlətimizin başçısına məlumat verib.
"Respublika ərazisində istehlakçıların kefiyyətli, dayanıqlı və fasiləsiz elektrik enerjisi ilə təchiz edilməsi üçün “Azərişıq” ASC tərəfindən 2019-cu il ərzində görülən işlər nəticəsində istehlakçılara satılan faydalı elektrik enerjisinin həcmi 17 216,5 min kVt/saat olub və ümumi yığım səviyyəsi 95,6%-ə çatdırılıb".
Bunu mətbuat konfransında qurumun Mətbuat xidmətinin rəhbəri Tanrıverdi Mustafayev deyib.
T.Mustafayev əlavə edib ki, Binəqədi rayonunun elektrik təchizatının yaxşılaşdırılması üçün 110/35/6 kV-luq “ETK-4” yarımstansiyası tam yenidən qurulub: "Yarımstansiyada 110 kV-luq açıq, 35 və 6 kV-luq qapalı paylayıcı qurğular yeni inşa edilərək eleqaz və vakuum tipli elektrik avadanlıqlarla təchiz olunub, 2x40 MVA gücündə transformator quraşdırılıb, qapalı paylayıcı qurğular 2 mərtəbəli binada yerləşdirilməklə növbətçi personal üçün bütün lazımi şərait yaradılıb. Xəzər rayonu ərazisində 35/6 kV-luq 2x25 MVA gücündə “Binə Aqro” yarımstansiyası inşa edilərək istismara verilib".
"Azərişıq" sözçüsü Xətai rayonunda görülən işlərdən də danışıb: "Xətai rayonunda 10/0,4 kV-luq 2x1600 kVA gücündə 276 saylı, 2x1000 kVA gücündə 3440 saylı, Yasamal rayonunda 6/0,4 kV-luq 2x1000 kVA gücündə 394 saylı, 10/0,4 kV-luq 2x1600 kVA gücündə 3330 saylı, 2x2500 kVA gücündə 465 saylı, 2x1600 kVA gücündə 19 saylı, 2x1000 kVA gücündə 447 saylı, Nərimanov rayonunda 10/0,4 kV-luq 2x1000 kVA gücündə 456 saylı, Səbail rayonunda 10/0,4 kV-luq 2x1600 kVA gücündə 944 saylı, Binəqədi rayonunda 6/0,4 kV-luq 2x1000 kVA gücündə 591 və 499 saylı, Xəzər rayonunda 6/0,4 kV-luq 1000 kVA gücündə “Binə Aqro” və “Qrand Aqro”, Suraxanı rayonunda 6/0,4 kV-luq 630 kVA gücündə Hövsan zeytun zavodunun transformator məntəqələri inşa edilərək və yenidən qurularaq istismara verilib”.
"Ağstafa rayonunda 110/35/10 kV-luq 2x25 MVA gücündə “Ağstafa”, Biləsuvar rayonunda 110/35/10-6 kV-luq 2x25+10 MVA gücündə “Səmədabad”, Ağdam rayonunda 110/10 kV-luq 16 MVA gücündə “Ergi” yarımstansiyaları əsaslı surətdə yenidən qurulub, Sumqayıt şəhərində 35/6 kV-luq 4 MVA gücündə “Tuqzavod”, Xızı rayonunda 35/10 kV-luq 1,8 MVA gücündə “Yeni Yaşma” yarımstansiyaları yeni inşa edilib", - o vurğulayıb.
Prezident İlham Əliyev tərəfindən fevralın 13-də və oktyabrın 28-də açılışı həyata keçirilən Beyləqan rayonundakı 110/35/10 kV-luq 2x25 MVA gücündə “Beyləqan-1”, Qəbələ rayonundakı 110/35/10 kV-luq 2x40 MVA gücündə “Qəbələ” və Ağdaş rayonundakı 110/35/10 kV-luq 2x2,5 MVA gücündə “Ağdaş” yarımstansiyaları tam şəkildə yenidən qurulub.
Bakı şəhərinin elektrik təchizatının yaxşılaşdırılması, elektrik enerjisinə artan təlabatın ödənilməsi üçün Xəzər rayonunda 1 yeni inşa edilmiş 10/35/10 kV-luq 2x40 MVA gücündə “Buzovna-1”, Yasamal rayonunda 110/35/10 kV-luq 2x50 MVA gücündə “Bayramzadə” yarımstansiyalarında tamamlama, Pirallahı rayonunda 110/35/6 kV-luq 2x40 MVA gücündə “Pirallahı” yarımstansiyasının tikinti işləri aparılmaqdadır.
Hesabat dövründə istehlakçıların elektrik təchizatının yaxşılaşdırılması üçün Bakı şəhərində və regionlarda 161 ədəd komplekt transformator məntəqəsi quraşdırılıb, 27,9 km 110 kV-luq, 44,1 km 35 kV-luq, 409,5 km 10 və 6 kV-luq, 36,2 km 0,4 kV-luq, 3066,3 km 0,4 kV-luq ÖİN hava xətləri çəkilib və təmir olunub, 46,6 km 110 kV-luq, 122,4 km 35 kV-luq, 344,3 km 10 kV-luq, 757 km 0,4 kV-luq kabel xətləri çəkilib. 2019-cu ildə 101 ədəd 110 kV-luq, 347 ədəd 35 kV-luq, 2895 ədəd 10 və 6 kV-luq yarımstansiyalarda elektrik avadanlıqlarının, 80 km 110 kV-luq, 510,2 km 35 kV-luq, 1567,8 km 10 və 6 kV-luq, 1600,4 km-ə yaxın 0,4 kV-luq elektrik verliş xətlərinin texniki vəziyyəti yoxlanılıb, aşkar edilmiş nasazlıqlar aradan qaldırılmaqla təmir və sınaq işləri aparılıb, 452 ədəd 10 və 6 kV-luq transformator əsaslı təmir olunub.
Regionlarda elektrik enerjisi itkilərinin azaldılması, elektrik enerjisi uçotunun dəqiq aparılması üçün istismar müddətini başa vurmuş 0,4 kV-luq elektrik şəbəkələrində yenidənqurma işləri aparılıb, bu işlər 46 rayonu, 76 kənd və qəsəbəni əhatə etməklə hesabat dövründə 19 kənd üzrə işlər tam yekunlaşdırılıb.
Hesabat müddəti ərzində ümumilikdə 281 300 ədəd olmaqla əhali istehlakçılarına aid 264 200 ədəd, qeyri-əhali istehlakçılarına aid 17 100 ədəd uçot dəstləri bərpa olunub.
Yeni Yaşma və Şurabad qəsəbələrində yerləşən Külək Elektrik Stansiyalarında 84 mln kVt/saat elektrik enerjisi istehsal olunaraq elektrik şəbəkələrinə ötürülüb.
“Azərişıq” ASC-də “Asan Kommunal” Mərkəzləri vasitəsi ilə abunəçilərə göstərilən xidmətlərin dairəsi daha da genişləndirilib və hazırda istehlakçılara 16 növ xidmət göstərilir.
T.Mustafayev əlavə edib ki, respublikanın bütün istehlakçılarının fasiləsiz və kefiyyətli elektrik enerjisi ilə təmin olunması istiqamətində “Azərişıq” ASC tərəfindən həyata keçirilən tədbirlər davam etdirilir.
“Azərbaycan Respublikasının Vergi Məcəlləsində dəyişiklik edilməsi haqqında” Qanunun tətbiqi barədə Azərbaycan Respublikası Prezidentinin 25 dekabr 2019-cu il tarixli Fərmanına uyğun olaraq ölkədə istehsal olunan spirtli içkilər, tütün məmulatları, eləcə də enerji içkilərinə aksiz vergisi dərəcələri dəyişdirilib.
Turkustan.info bildirir ki, aksiz dərəcəsi araq, tündləşdirilmiş içkilər və tündləşdirilmiş içki materialları, likyor və likyor məmulatlarının hər litri üçün 2 manatdan 3,2 manata, şampan şərabının hər litri üçün 2,5 manatdan 2,6 manata, şərablar və şərab materiallarının hər litri üçün 0,1 manatdan 0,2 manata, pivə və pivə tərkibli digər içkilərin hər litri üçün 0,2 manat manatdan 0,4 manata artırılıb.
Digər yüngül spirtli içkilər üzrə aksiz dərəcəsi bir litr üçün 0,4 manat məbləğində müəyyən edilib. Konyak və konyak məhsullarıın hər litri üçün tətbiq edilən 6 manat aksiz dərəcəsi isə 3,2 manata endirilib.
Tütün məmulatları üzrə aksiz dərəcəsi hər min siqaret, siqarilla və tütün əvəzedici üçün 21 manatdan 31 manata qaldırılıb.
Enerji içkiləri üzrə aksiz dərəcəsi hər litri üçün 3 manatdan 3,1 manata qaldırılıb. / Trend/
"Bu gün biz 2018-ci ildə təməlini qoyduğunuz 45-ci kilometrdən Rusiya Federasiyasının sərhədinə qədər olan 192 kilometr yolun başlanğıcında dayanmışıq. Biz 192 kilometrlik bu yolu 4 lota bölmüşük. Bu, birinci lotdur, hansı kı, Zeynalabdin Tağıyev qəsəbəsindən Giləzi qəsəbəsinə qədər 30 kilometrlik yoldur. Bu yolun hazırda bir istiqamətdə 90 faizinin asfalt-beton örtüyünü tam yerinə yetirmişik. Yerdə qalan hissələrinin isə tikintisi gedir".Bunu Prezident İlham Əliyevin Bakı-Quba-Rusiya Federasiyası dövlət sərhədi yeni avtomobil yolunun tikintisi ilə tanış olan zaman Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov deyib.
Bu hissələrdə yolun tam eni 27,5 metr təşkil edəcək. Hərəkətin hər iki istiqamətində iki zolaq olacaq. Qurum rəhbəri bildirib ki, yol ödənişli olduğu üçün bu yerdə turniketlər qoyulacaq: "Yol ödənişli olduğu üçün dayandığımız bu yerdə turniketlər qoyulacaq. Turniketlər hissəsində hər istiqamətdə 5 cərgəli yol olacaq, 4 cərgəsi hərəkət, 1 cərgəsi ehtiyat maşınların saxlanması üçün. Yolun hər iki tərəfi çəpərlənəcək ki, hərəkət hissəsinə kənar heç nə daxil ola bilməsin. Yol ətrafında maşınlara xidmət üçün dayanacaqlar olacaq".
Azərbaycan Respublikasının Prezidenti İlham Əliyev dekabrın 26-da Bakı-Quba-Rusiya Federasiyası ilə dövlət sərhədi yeni avtomobil yolunun tikintisi ilə tanış olub.
Dövlətimizin başçısına yeni avtomobil yolunun tikintisi çərçivəsində görülən işlərlə bağlı məlumat verilib.