Bu günlərdə Ermənistanın baş naziri Rusiya Prezidentinə rəsmi Moskvanın Ermənistanın təhlükəsizliyini təmin etmək üçün göstərə biləcəyi yardımla bağlı məsləhətləşmələrə dərhal başlamaq xahişi ilə müraciət edib.

Axar.az xəbər verir ki, bu barədə Ermənistanın xarici işlər naziri Zöhrab Mnatsakanyan parlamentdəki jurnalistlərə müsahibəsində bildirib.

”Müqavilə münasibətlərimizə və bundan irəli gələn funksiyalara gəldikdə, deyə bilərəm ki, hazırda bütün lazımi tədbirlər görülür. 1997-ci il müqaviləsi baza müqaviləsidir və bundan başqa sənədlərdə də ifadə olunan funksiyalar irəli sürülür”, – deyə Mnatsakanyan bildirib.

Nazir KTMT-nin ən azı iki üzvünün – Belarus və Qazaxıstanın bilavasitə Azərbaycanın iqtisadi tərəfdaşları olduğunu nəzərə alaraq, KTMT-yə müraciət etmək üçün maneələrin olub-olması ilə bağlı sualı da cavablandırıb:

”Bu sual dərin təhlil və uzun bir müzakirə mövzusu ola bilər. Konkret cavab isə budur ki, biz səmərəlilik və sürət baxımından vacib saydığımız addımları atırıq. Biz mövcud alətlərə uyğun olaraq üç həmsədr və ayrı-ayrı ölkələrlə işləyirik. İlk gündən etibarən bütün alətlərimizi işə salmışıq”.