İtaliya Parlamentinin Senatı COVID-19 pandemiyası ilə əlaqədar ölkədə fövqəladə vəziyyət rejiminin oktyabrın 15-dək uzadılmasını dəstəkləyib.
Təklif ölkənin Baş naziri Cüzeppe Konte tərəfindən verilib.

O, Senatda ölkədə sürətlə yayılan epidemiyanın qarşısının alınması çərçivəsində müvafiq tədbirlərin genişləndirilməsi təklifi ilə çıxış edib.
Müzakirələr zamanı İtaliya hökumətinin nəzdində yaradılan Elmi və Texniki Komitənin məlumatlarına əsasən bildirilib ki, ölkədə virusun yayılma tempini əks etdirən rəqəmlər bu təklifin keçərli olduğunu zəruri edir.

Fövqəladə vəziyyət rejiminin uzadılması məsələsi Nazirlər Şurasının səhər iclasında müzakirə edildikdən sonra qanunverici orqan tərəfindən baxılması təklif olunub.

Qeyd edək ki, müzakirələrdən sonra təklif qəbul edilib.APA