 |
 |
Bakının bir neçə rayonunda sənədsiz evlərin dövlət qeydiyyatına alınması məqsədi ilə işlərə başlanıb.
"Ölkə.Az" "Xəzər TV"yə istinadən xəbər verir ki, Nərimanov rayonu, Xutor qəsəbəsi 1-ci Şimal Ştilliyi, 4-cü Aşırım və digər küçələrdə yerləşən sənədsiz həyət evlərinin dövlət qeydiyyatına alınması üçün mənzil və həyətyanı sahələrdə ölçmə işləri aparılıb. Sakinlərə isə bildirilib ki, ölçmə işlərinin aparılması yaxın vaxtlarda sənədsiz evlərə çıxarışların verilməsi məqsədi daşıyır.
Nərimanov rayonu 53 saylı Mənzil Kommunal İstismar Sahəsinin mühəndisi Edson İmanovun sözlərinə görə, ərazi üzrə yerləşən sənədsiz həyət evlərinin dövlət qeydiyyatına alınması işləri 90 faiz yerinə yetirilib. Xüsusi ilə də Xutor qəsəbəsi ərazisində yüzlərlə sənədsiz həyət evlərində ölçmə işləri aparılıb və həmin evlər qeydiyyata alınıb.
Nəsimi rayonu 3-cü Alatava, Cəlil Məmmədquluzadə və bir neçə küçələrdə də bu işlər aparılıb. Ancaq bəzi sənədsiz evlər var ki, həmin evlərdə ölçmə aparılmayıb.
Nəsimi rayon 33 saylı Mənzil Kommunal İstismarı Sahəsinin rəisi Mirnazir Əliyevin sözlərinə görə, rayon ərazisində olan sənədsiz evlər və həyətyanı ərazilərdə ölçmə işləri bu ilin sonuna kimi yekunlaşacaq. Qeydiyyata alınan sənədsiz evlərlə bağlı məlumatlar isə Nəsimi rayon İcra Hakimiyyətinə təqdim ediləcək.
Qeyd edək ki, sənədsiz evlərin qeydiyyata alınması ilə bağlı Bakıda bir neçə rayon icra hakimiyyətlərində komissiya təşkil edilib.
Eybəcər görkəmdəki şəklini gördüyünüz Azərbaycan Tibb Universitetinin 4 saylı bu tələbə yataqxanasında, nə az, nə çox, düz 26 il idi ki, amansız düşmən təcavüzü nəticəsində dədə-baba yurdlarından didərgin düşən 128 məcburi köçkün ailəsi yaşayırdı. Bu ilin aprel ayının 26-da Azərbaycan Respublikasının Birinci vitse-prezidenti Mehriban xanım Əliyeva bu yataqxanaya gələndən, buradakı ağır yaşayış şəraiti ilə yaxından tanış olandan sonra, məcburi köçkünlərin bu dözülməz problemləri ilə bağlı verdiyi vədini az keçmiş yerinə yetirdi. Konkret desək, sentyabr ayında bu ailələrin Qobu qəsəbəsində məcburi köçkünlər üçün salınan şəhərciyə köçürülməsinə ciddi göstəriş və start verildi. Di gəl ki, el arasında "Qaçqınkom" kimi tanınan Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsindəki rəhbər kreslo sahibləri, bu vacib göstərişə belə məhəl qoymadan, bu köçürülmə prosesini də, öz istəklərinə və şəxsi maraqlarına uyğun həyata keçirməkdən çəkinmədilər. Bunun ən pis nəticəsi isə, indi, göz qabağındadır: Onların bağışlanmaz günahları ucbatından, altı məcburi köçkün ailəsi, qışın bu soyuq-şaxtasında, hələ də, artıq işığı, qazı və suyu belə tamamilə kəsilən bu yataqxanadakı dağıntılar altında yaşamağa məhkumdurlar. Məhkum edən vəzifə sahiblərinin isə, heç nə veclərinə deyil. Zillət içərisində yaşayan bu ailələrə, araz.az saytının əməkdaşları olaraq, biz də baş çəkdik. Doğrudan da, bu ailələrin mənzillərində gördüklərimiz urək göynədir. Ən dəhşətlisi odur ki, məcburi köçkünlər, paytaxt Bakının mərkəzində soyuqdan donmamaq üçün, ilin-günün bu vaxtında belə, qaldıqları mənzillərində qaldıqları odun sobasının tüstüsündə boğulurlar.
Odun sobası yanındakı foto-şəklini gördüyünüz 72 yaşlı Leyla nənə də, düz 26 ildir ki, bu yataqxanada tək-tənha yaşayır -- demək olar ki, heç kimi yoxdur. Laçın rayonundan məcburi köçkündür. Özünün dediyi kimi:
-- "Qaçqınkom" mənim də "başıma oyun açır". Mənə mənzil verməmək üçün, yüz yalana əl atır. Guya, mən imkanlıyam, hətta mənzil almağa belə gücüm çatar. İndi nə edəcəyimi bilmirəm. Soyuqdan öz mənzilimdə qala bilmirəm. Rövşən qonşum sağ olsun, mənzilinə sığınıb, birtəhər gün keçirə, odun peçinin istisinə sığınırıq. Qazımızı və işığımızı da qəsdən kəsiblər ki, tez buradan çıxaq. Hətta bizi sudan da məhrum ediblər. Buna nə ad vermək olar?! Axı, müsəlman olan heç kəs belə hərəkət etməz...
Fotodakı digər şəxs isə, Leyla nənənin minnətdarlıq etdiyi Rövşən Abbasovdur. ll qrup müharibə əlili olan yaxası medallı bu Qarabağ döyüşçüsü Zəngilan rayonundan məcburi köçkündür. Onlarla bərabər, bu yataqxanada məskunlaşan digər qonşularına artıq yeni şəhərcikdə mənzillər verilib. O isə, 4 nəfər ailə üzvü ilə bərabər, hələ də, yataqxanada qalıb. Ən dəhşətlisi odur ki, qazimizin ailəsi də, yüz gündən çoxdur ki, sökülən və bütün kommunal xidmətləri qəsdən tamamilə dayandırılan bu yataqxanada dağıntılar altında yaşamağa məhkum ediliblər. Bir sözlə, qışın bu yağışlı və şaxtalı günlərində soyuqdan əziyyət çəkən bu ailə də, zillət içərisində yaşayır. "Qaçqınkom" isə, öz bildiyini edir və Birinci vitse-prezidentin ciddi göstərişi ilə, Qarabağ döyüşçüsünə ayrılmalı olan 3 otaqlı mənzili vermək istəmir...
WhatsApp Image 2019-12-16 at 22.32.03.jpeg...Rövşən Abbasovla yataqxananın acınacaqlı durumda olan bütün mərtəbələrini gəzirik. Mərtəbələrin sökülüb, dağıdılmış döşəmələri üstündə yeriməkdə çətinlik çəkirik. Bütün otaqların sınıq-salxaq qapı-pəncərələri pis gündədir, sanki döyüşdən çıxıb. Su xətlərinin və kanalizasiya sistemlərinin tamamilə sıradan çıxması əsl dəhşət yaradıb. Elə, buna görədir ki, buradakı ayaqyollarının hamısı çoxdandır işləmir.
-- İnsanın olduqca ağır belə bir şəraitdə yaşaması tamamilə mümkünsüzdür. Mən, insanların belə əziyyət çəkməsini 1992-ci ildə, Qarabağda ağır döyüşlər gedən vaxtlar görmüşəm. Onda, mən, Milli Ordunun tərkibində vuruşur, 30 nəfərlik kəşfiyyat qrupuna rəhbərlik edirdim. Bu səbəbdən, amansız düşmən tərəfindən qarabağlıların başlarına gətirilən bütün dəhşətlərin şahidi olurdum. Özünüz də görürsünüz ki, indi şahidlik etdiyimiz bu dəhşətlərin, o vaxtkı həmin dəhşətlərdən elə bir fərqi yoxdur. Fərq yalnız ondadır ki, indi, yalnız güllə atılıb, mərmi partladılmır. Bu altı ailə üç aydan çoxdur ki, sanki hansısa ağır durumlu bir döyüş bölgəsinin uçuq-sökük sığınacağında yaşayırlar. Qaz və işığımızı da qəsdən kəsiblər ki, öz istədikləri kimi hərəkət edə bilsinlər. Bu azmış kimi, sudan istifadə etməyimizə belə imkan vermirlər. Bütün bunlar, vur-tut 26 illik ömrü olan bu "Vətəndən" də didərgin düşməyimiz üçündür. Bəs, o biri ailələr hara getsinlər, deyən yoxdur! Bu biabırçılıq, hətta, "Qaçqınkom"un sədrinin də vecinə deyil. Soyuq qış ayında insanı belə bir zülmə salmaq, Allahı olan hansı müsəlmana yaraşar?! Mən tam əminəm ki, Mehriban xanım bu ailələrin belə acınacaqlı vəziyyətləri barədə məlumata malik olsa idi, çoxdan özünün təcili və ciddi tədbirlərini görərdi! -- Qarabağ qazisi yataqxanadakı ağır durumla bizi tanış edə-edə, təəssüf doğuran bu sözləri söyləyir. Onu da bildirir ki, Mehriban xanım Əliyeva aprel ayında bu yataqxanada məskunlaşan məcburi köçkün ailələrinə baş çəkib, onların dərd-sərləri, problemləri ilə maraqlananda, onun həyat yoldaşı və qızıyla da səmimi söhbət edib:
-- Səmimilik o dərəcədə olub ki, ölkənin birinci xanımı, hətta həyat yoldaşımla və qızımla şəkil də çəkdirib. Üstəlik, son vaxtlar həyat yoldaşımı və məni daha da narahat edən vacib bir problemimizi həll etmək üçün, "Qaçqınkom"un sədri Rövşən Rzayevə öz ciddi tapşırıqlarını verib. Di gəl ki, o, bu tapşırığa əməl edib, bizim indi dörd nəfərlik, bu yaxınlarda toyunu edəcəyimiz gəlinimizlə beş nəfərlik olacaq ailəmizə üç otaqlı mənzil vermək istəmir. Elə, hey deyir ki, şəhərcikdə üç otaqlı mənzil yoxdur. Halbuki şəhərcikdəki həmin evdən, məcburi köçkün olmayan ayrı-ayrı adamlara, qanunsuz olaraq, mənzillər verilib. Çoxunu heç tanımırıq da. Bu yolla mənzil alanlar arasında, Azərbaycanın işğala məruz qalmayan sakit bölgələrindən, hətta Gürcüstandan olan və çoxdan Rusiyada məskunlaşıb, bu ölkənin vətəndaşlığını alan soydaşlarımız da var. Bu barədə, əlimizdə, danılması mümkün olmayan çox faktlar var. Elə, götürək, bizim bu yataqxanada son yeddi ayda komendant olmuş Polad müəllimi. Məcburi köçkünlük, ya da qaçqınlıq ağrısı çəkməyib. Paytaxtdakı mülkləri də bir deyil, iki deyil!.. Nə olsun, o da istədiyini alıb. Açıq-aydın görünür ki, pul və tapşırıq gücünə haqqımıza şərik çıxanlar belə bir deyil, beş deyil, on beş deyil...
Onu da, qeyd edim ki, başımıza gətirilən bu biabırçılıqlarla bağlı ölkə rəhbərinə, aidiyyatı dövlət qurumlarının rəhbərlərinə, rayon başçısına, dəfələrlə yazmışam. Rövşən Rzayevin özü ilə bir neçə dəfə görüşüb, etirazımı ona da çatdırmışam. Nə olsun, özünü elə aparır ki, sanki heç kimi saymır. Məcbur olub, ölkə başçısına və Birinci vitse-prezidentə ünvanladığım xeyli sayda müraciətlərimin surətini sədrin özünə də çatdırmışam. Lakin yazdıqlarımın xeyri olmayıb, xeyirli bir cavab almamışam. Xahiş edirəm, şikayət xarakterli həmin müraciətlərimin birini, eləcə də həyat yoldaşımın və qızımın Mehriban xanımla çəkdirdikləri foto-şəkli saytınızda dərc edəsiniz. Bəlkə, bundan sonra, bunların bir xeyrini görək...
...Hələ də bu yataqxanada qalıb, olduqca pis günlərini keçirən digər dörd ailənin üzvləri də, əslən Zəngilandan, Laçından və Cəbrayıldan olan məcburi köçkünlərdir. Üç aydan çoxdur ki, insan həyatı üçün vacib çox şeydən məhrumdurlar. Nə çaylarını qaynada, nə yemək biş-düşü ilə məşğul ola, nə paltar-palazlarını yuya, nə də ki, his-paslarından təmizlənə bilirlər. Daha çox isə, soyuqdan sağlamlıqlarını itirmək təhlükəsi ilə üz-üzədirlər. Onlara mənzil verilməməsinin səbəbi, bu işə məsul vəzifə sahiblərinin ortaya atdıqları ağlagəlməz versiyalarla bağlıdır. Buna etiraz edən həmin məcburi köçkünlərin isə, döymədikləri məmur qapısı qalmayıb. Di gəl ki, onların bu barədə haqlı şikayətlərinə məhəl qoyan tapılmır ki, tapılmır.WhatsApp Image 2019-12-16 at 22.31.23.jpeg
Yurd-yuvalarından didərgin düşən bu talesiz insanların dərd-sər dolu bu problemləri də, mətbuat əməkdaşları olaraq, bizi, olduqca narahat etdi. Hallarına acıdığımız bu talesizlərə kömək üçün başqa imkanımız olmadığından, "Məcburi köçkünlərə dəstək olaq!" -- deyib, bu çağırışımızı aidiyyatı dövlət qurumlarının rəhbərlərinə də çatdırmağı lazım bildik. Axı, darda qalan və olduqca çətin günlərini yaşayan bu çarəsizlərin taleləri ilə maraqlanmaq, vəzifəsindən asılı olmayaraq, hər kəsin vicdan borcu olmalıdır. Bu, həm də, Ulu Tanrı buyruğudur!
REDAKSİYADAN:
Qarabağ qazisi Rövşən Abbasovun özünün xahişi, eləcə də bizdən ona dəstək məqsədi ilə, başına gətirilənlər barədə, onun ölkə başçısına və Birinci vitse-prezidentə ünvanladığı şikayət xarakterli bir müraciətini nöqtəsinə, vergülünə toxunmadan araz.az saytında dərc etməyi vacib bildik:
Azərbaycan Respublikasının Prezidenti möhtərəm İlham Əliyev cənablarına
Azərbaycan Respublikasının Birinci vitse-prezidenti Mehriban xanım Əliyevaya
Sürəti: Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayevə
Zəngilan rayonunun Üzümçülər qəsəbəsindən məcburi köçkün, ikinci qrup müharibə əlili Rövşən Məmmədqulu oğlu Abbasov tərəfindən
MÜRACİƏT
Möhtərəm Prezident!
Çox hörmətli Mehriban xanım!
İnsanlara qarşı hərtərəfli qayğınızı və doğma Vətəndə gedən böyük islahatları gözümüzün önündə canlandıranda, görürük ki, harada yaşamalarına baxmayaraq, bütün azərbaycanlıların dərd-sərləri ilə maraqlanan rəhbər kimi, daim onların yanındasınız. Məhz buna görədir ki, erməni təcavüzü nəticəsində doğma yurd-yuvalarından didərgin düşən, ayrı-ayrı yerlərdə məskunlaşıb, ağır şəraitdə fəaliyyət göstərən məcburi köçkünlər də, üzləşdikləri çətin problemlərinin aradan qaldırılmasında onlara kömək üçün, öncə, Sizə müraciət etməyi lazım bilirlər. Zəngilan rayonundan məcburi köçkün olan, Qarabağ müharibəsində kəşfiyyat qrupuna rəhbərlik edib, döyüş tapşırıqlarını ləyaqətlə yerinə yetirərkən müxtəlif dərəcəli bədən xəsarətləri alan, bütün bunlara görə müxtəlif döyüş mükafatlarına, orden və medallara layiq görülən ikinci qrup müharibə əlili kimi, mən də, arzuolunmaz bir problemimlə bağlı, Sizə müraciət etməyi vacib bildim. Çünki 4 nəfər ailə üzvümlə bərabər, 26 ildir məskunlaşdığımız Azərbaycan Tibb Universitetinin 4 saylı yataqxanasında üzləşdiyimiz həmin problemimizin həlli müşkülə çevrilib.
Ümumiyyətlə, qeyd etdiyim müddət ərzində bu yataqxanada 128 məcburi köçkün ailəsi də yaşayıb. Bu ilin sebtyabr ayında isə, onlar, Sizin təşəbbüsünüzlə Qobu qəsəbəsində məcburi köçkünlər üçün salınan şəhərciyə köçürülüblər. Biz isə, indiyədək, sökülüb, dağılmaqda olan bu yataqxanada yaşamağa məcbur olmuşuq; Konkret desək, aidiyyatı dövlət qurumlarının rəhbərlərinin təqsirləri ucbatından, 45 yaşlı Qarabağ qazisi, müharibə əlili olaraq, ailə üzvlərimlə birlikdə bu taleni yaşamağa məhkum edilmişik. Doğrudan da, qışın soyuq-şaxtasında işıq, su və qaz xətləri tamamilə kəsilən bu yataqxanadakı dağıntılar altında kritik vəziyyətdə, zillət içərisində yaşamaq, düşmən əsirliyində ömür sürməkdən betərdir. Demək olar ki, bir-birindən heç nə ilə fərqlənmir və öz görüntüləriylə ürək göynədir. Lakin bu biabırçı mənzərələr aidiyyatı dövlət qurumlarının, eləcə də, məsuliyyət tələb edən bu işə birbaşa cavabdehlik daşıyan Qaçqınların və Məcburi Köçkünlərin İşləri üzrə Dövlət Komitəsinin rəhbərlərinin veclərinə də deyil. Hətta, daş ürəkli bu kreslo sahibləri, Qarabağ döyüşçüsü olsam da, ölkənin Birinci vitse-prezidentinin göstərişi ilə ailəmizə ayrılan 3 otaqlı mənzili bizə verməkdə belə insafsızlıq edirlər. Nəticədə, mənzil problemimiz ucbatından, illərdir, bizim ailə üçün müşkül məsələyə çevrilən nişanlı oğul toyunu etməyimiz mümkün görünmür.
Bir daha bildirmək istəyirəm ki, bizim ailənin ev məsələsi ilə bağlı, köçürülmədən öncə Mehriban xanım Əliyevanın özünün birbaşa verdiyi göstərişləri, nə komitə sədri Rövşən Rzayev, nə onun müavini Eldar Zeynalov, nə də digər aidiyyatı dövlət qurumlarının rəhbərləri yerinə yetirmək istəmirlər. Dəfələrlə onlara yazılı və şifahi şəkildə də bildirmişəm ki, bizim ailənin mənzil probleminin yoluna qoyulmasını, Mehriban xanım Əliyeva birbaşa Rövşən Rzayeva tapşırıb. Lakin bu dediklərim belə, komitə sədri qarışıq, digər vəzifə sahiblərini də narahat etməyib. Üstəlik, mənim narahatlığımdan irəli gələn suallarıma onlardan qəribə cavablar almışam. Hətta qorxub-cəkinmədən belə də deyiblər ki, Mehriban xanım gəlib, bu deyilənləri sübut etsin.
Açıq-aşkar görünür ki, hal-hazırda yeni evimizə köçməkdə biz məcburi köçkün ailələrinə əngəl olanlar rahat kreslo sahibləridir. Bu səbəbdən, çox ağır, acınacaqlı və dözülməz həyat şəraitində günlər keçiririk. Hara yazmağımıza baxmayaraq, dərdimizə əlac edən, problemimizi yoluna qoyan tapılmır. Beləcə, Nazirlər Kabinetinin 1917-ci ildə qəbul etdiyi 65 saylı qərardan sui-istifadə edən həmin məmurlar agır durumda yaşayan məcburi köçkünlərin haqqına girməkdən belə çəkinmirlər. Onlar, hətta bizim üçün tikdirdiyiniz bu evlərdəki xeyli mənzili, məcburi köçkünlüyə heç bir aidiyyatı olmayan ailələrə satıblar. Bu barədə, cox ciddi və danılması mümkün olmayan xeyli fakt da bilirik. Di gəl ki, bütün bunlar barədə yazdıqlarımıza məhəl qoyan tapılmır.
Möhtərəm Prezident!
Çox hörmətli Mehriban xanım!
Tam əminəm ki, bu xoşagəlməzliklər barədə ətraflı məlumatınız olsaydı, bunun qarşısını almaq üçün, Sız, indiyədək cox ciddi tədbirlərinizi görərdiniz. Xahiş edirəm, məcburi köçkün ailələrinə qarşı törədilən belə haqsızlıqların aradan qaldırılmasına ciddi göstərişlərinizi verəsiniz! Qarabağ qazilərinə və məcburi köçkünlərə daim dəstək olduğunuz üçün, bir daha, Sizə, öz dərin minnətdarlığımı da çatdırıram!
Dərin hörmət və səmimiyyətlə, Rövşən Abbasov.
Bakı şəhəri.
11.12.2019-cu il. //araz.az//
İndi ən çox təlaş içində olanlar vaxtında keçmiş məmurların “seçdirdiyi” deputatlardır. Artıq “Şakir Şəkəroviç”lərə çevrilən eks-nazirlər nə o haydadırlar ki, yenidən himayələrində olan adamları parlamentə salmağa can atsınlar, nə də əvvəlki qüdrət, nüfuz, təsir imkanları qalıb.
Ona görə də V çağırış üzrə deputatlar arasında bəziləri əl-ayağa düşüblər, təşviş keçirirlər ki, 9 fevralda keçiriləcək növbədənkənar parlament seçkilərində onların aqibəti necə olacaq.
Belə xəbərlər var ki, sabiq nazirlərdən Ziya Məmmədovun, Eldar Mahmudovun, Fazil Məmmədovun kadrları, habelə keçmiş PA rəhbərliyinə yaxınlığı ilə seçilən deputatların növbəti dəfə mandat sahibi olacağı sual altındadır. Hətta bəzilərinin üstündən xətt çəkildiyi iddiaları da var. Gözləntilər gələnilki seçkilərdə Milli Məclisin indiki tərkibinin əhəmiyyətli şəkildə yenilənəcəyi yönündədir.
Bir sıra yaşlı deputatların, millət vəkilliyi ilə yanaşı, hökumətdə müxtəlif vəzifə tutan mandat sahiblərinin parlamentdən kənarda qalacağı proqnozlaşdırılır.
ADP sədri Sərdar Cəlaloğlunun “Yeni Müsavat”a bildirdiyinə görə, hakimiyyətdən uzaqlaşdırılmış qüvvələrin deputatları daha parlamentdə olmayacaqlar. Onun sözlərinə görə, əvvəllər icra hakimiyyəti orqanlarında olduğu kimi qanunverici orqanda da nazirlərin nümayəndələri varıydı.
S.Cəlaloğlu hesab edir ki, həmin deputatlar bu müddət ərzində nazirliklərin maraqlarına uyğun qərarlar çıxarıblar, xalqın mənafeyinə zidd addımlar atıblar: “Onlar təmizlənirlər və parlamentdə yeni qüvvələr təşkil ediləcək. Bəzi nazirlərə bağlı deputatlar varıydı ki, qanunverici orqanı işləməyə qoymadılar. Millətin əleyhinə danışırdılar. Onların arasında ruspərəst qüvvələr varıydı, Qarabağ probleminin uzanmasında maraqlıydılar. Bu ”5-ci kolon"un parlamentdə uzantısı mövcud idi. Güman edirəm ki, onlar daha olmayacaqlar. Hər halda, 20 ildə parlament xalqın maraqlarına uyğun xidmət göstərməyib".
Adı hər zaman qalmaqallarda, dələduzluqda və digər mənfi olaylarda hallanan İsfəndiyar Axundovun başı yenə cəncəldədir. Onun biznesi ilə bağlı həmişə ciddi suallar olub və yenə də var. “Google”da kiçik axtarış aparmaq kifayətdir ki, onun adının mənzil dələduzluğuna dair saysız-hesabsız qalmaqallarda çəkildiyinə, tikinti kooperativləri tərəfindən aldadılaraq pulları əllərindən alınmış çoxsaylı vətəndaşların prezidentdən başlamış ən müxtəlif instansiyalara yazdıqları saysız-hesabsız şikayətlərdə baş rolda yer aldığına şahid olasan. Maraqlıdır ki, hər dəfə də “Şərurlu İsfəndiyar” kimi tanınan bu şəxs sudan quru çıxmağı bacarıb. Amma cumhuriyyet.az olaraq indi təqdim edəcəyimiz olayın sonu ya İ.Axundovun həbsi ilə bitməli, ya da bu oliqarx Azərbaycanda qanundan və prezidentdən üstün olduğunu göstərməlidir.
“Mur-Ay” MMC aldatdı, “Şərur” MTK öhdəsinə götürdü
2011-ci ildə “Mur-Ay” MMC-nin vəzifəli şəxsləri dələduzluq edərək 317 mənzil və qeyri-yaşayış sahələrini 1000-dən çox vətəndaşa sataraq bizə küllü miqdarda ziyan vurduqları üçün cinayət işi başlanmış və onlar həbs edilmişlər. “Mur-Ay” MMC-nin vətəndaşlara yaratdığı ciddi problem və bu problemdən doğan gərginlik Azərbaycan Prezidentimiz İlham Əliyev cənablarının diqqətini cəlb etmiş və problemin həll edilməsi üçün aidiyyatı dövlət qurumlarına, o cümlədən Bakı şəhər İcra Hakimiyyətinə müvafiq göstəriş vermişdir.
17 dövlət qurumu və İsfəndiyar Axundov imza atıb “kişi kimi” söz verdi, amma…
Cənab Prezidentin göstərişi əsasında 29 dekabr 2011-ci il tarixdə Bakı Şəhər İcra Hakimiyyəti başda olmaqla 17 dövlət qurum və təşkilatları, həmçinin “Şərur” MTK da bu problemin həllinə cəlb olunaraq birgə müqavilə imzalamışlar. Həmin müqavilədə “Şərur” MTK adından imza atan İsfəndiyar Axundov 15 bəndlik öhdəlik götürmüşdür ki, bu öhdəliklərə görə “Şərur” MTK
– Obyektininşasının təsdiq olunmuş layihə sənədləri üzrə, texnoloji və normativ ardıcıllıqla aparılmasını, tikintidə keyfiyyətli inşaat materiallarınndan istifadə olunmasını və bütövlükdə tikinti işlərinin yüksək keyfiyyətlə və tam həcmdə yerinə yetirilməsini təmin edərək, direktiv müddətdə-yəni bütün sənədləşmə işləri başa çatdıqdan və pul vəsaiti ayrıldıqdan sonra 24 ay müddətinə başa çatdırılmasını;
– Mənzillərin “MUR-AY” MMC-nin qeyri-qanuni hərəkətlərindən zərər çəkmiş mənzil alıcıları tərəfindən məskunlaşması üçün şəraitin yaradılmasını;
– “MUR-AY” MMC-nin payçılarına veriləcək mənzillərin bir kvadratmetrinin qiymətinin 400 manatdan artıq dəyərləndirilməyəcəyini;
– “MUR-AY” MMC-nin payçılarının mənzillə təmin edilməsini və bununla bağlı müqavilə iştirakçılarına müvafiq məlumatların verilməsini;
– “MUR-AY” MMC-nin mənzil almaqdan imtina etmiş alıcılarına(belə hal olduqda), ödəmiş olduqları pul vəsaitini, onların imtina etdikləri mənzillərin digər alıcılara satıldıqdan sonra qaytarılmasını
öz üzərinə götürmüşdür. Aidiyyatı dövlət orqanları da müqaviləyə uyğun olaraq üzərlərinə düşən bütün digər yardımları etmişlər. “Mur-Ay” MMC-nin bütün əmlakları “Şərur” MTK-nın balansına keçirilmiş, əlavə olaraq “Şərur” MTK-ya 4 hektardan artıq torpaq sahəsı və 10 milyon manat maliyə yardımı ayırmışdır. “Şərur” MTK-nın sahibi İsfəndiyar Axundov şəxsən imzaladığı bu müqavilənin 21-ci bəndinə uyğun olaraq “MUR-AY” MMC zərərçəkənlərini 2 il müddətdə, yəni geci 2015-cü ildə mənzillə təmin etməli idi. Lakin “Şərur” MTK-nın rəbəri İsfəndiyar Axundov həmin müqavilə üzrə üzərinə götürdüyü öhdəliyinin bir qismini icra etsə də, zərərçəkmişlərə müxtəlif bəhanələrlə mənzil verməkdən imtina etmişdir.
Məhkəmələr qərar çıxarır, İsfəndiyar Axundov saymır…
Əslində bu kimi halda dövlət özü İsfəndiyar Axundovdan üzərinə götürdüyü öhdəliyi icra etməsini tələb etməliydi. Çünki ortada dövlət başçısının göstərişi, 17 dövlət qurumunun bir şirkətə güzəştləri və nəhayət hüquqları pozulmuş onlarla vətəndaşın haqqı var idi. Amma “odda yanmaz, suda batmaz” odioza çevrilən İ.Axundov bütün qanunlara məhəl qoymayaraq “toxunulmazlıq” statusunu qoruya bilir. 2018-ci ilin mart-dekabr ayları müddətində zərərçəkmişlər öz haqlarını məhkəmə yolu ilə bərpa etməyə çalışır və beləliklə həm Bakı Apellyasiya Məhkəməsində həm də Ali Məhkəmədə qanuni və ədalətli qərar çıxarılmışdir. Bu qərarlarda “Şərur” MTK-nın zərərçəkənləri mənzillə təmin etməyə borclu qoduğu konkret və adbad göstərilmişdir.
“Şərur” MTK-nın boynunda qalan mənzil sahələri: AUDİT FAKTI
Məhkəmə qərarı ilə işə cəlb edilmiş və 4 aydan çox çəkən “Azərbeynəlxalqauditxidməti” MMC-nin yoxlamasının 08 oktyabr 2018-ci il tarixli yekun Aktında İsfəndiyar Axundovun çoxsaylı cinayət tərkibli əməlləri açıq-aşkar öz təsdiqini tapmışdır.Həmin Aktda gəlinən nəticəni cumhuriyyet.az olaraq diqqətinizə çatdırırıq: “Mülki işin materiallarında olan “Şərur” MTK tərəfindən təqdim edilmiş cədvəldə və “Şərur” MTK və ona yaxın MTK-lar tərəfindən verilmiş müqavilələr arasında qeyd olunan iddiaçılara yaşayış və qeyri-yaşayış sahələrinin verilməsi aşkar edilmədi. Beləliklə müəyyən edilir ki, iddiaçılara ümumilikdə 1233,70 kv.metr yaşayış sahəsi və 870 kv.metr qeyri-yaşayış sahəsi “Şərur” MTK və ona yaxın MTK-lar tərəfindən verilməmişdir“. Buna baxmayaraq aidiyyatı orqanlardan heç biri cəsarət edib bu “məğlubedilməz” iş adamının qanunsuz əməllərinə dur demir.
Dövlət bir oliqarx qarşısında gücsüz qalıb, yoxsa Fikrət Məmmədov İsfəndiyar Axundovdan çəkinir?
Məhkəmə qərarlarından sonra Binəqədi Rayon İcra və Probasiya şöbəsi 2019-cu il sentyabrın 19-da icraata başlamaq haqqında qərar çıxarır. Məhkəmənin Qərarını İcra etməli olan Binəqədi Rayon İcra və Probasiya şöbəsinin böyük icra məmuru, I dərəcəli ədliyyə qulluqçusu Ələddin Hüseynovun imzaladığı qəra5rda açıq şəkildə göstərilir: “Borclu “Şərur” MTK-ya təklif olunsun ki, 10 gün müddətində icranı könüllü olaraq təmin etsin. İcra könüllü təmin edilmədikdə:
– borclu barəsində məcburi icra tədbiri görülsün;
– icra sənədinin icrasını təmin etmək məqsədi ilə borclunun əmlakı siyahıya alınsın və həmin əmlak üzərinə həbs qoyulsun”. Qərarın çıxarılmasından 10 yox, 100 günə yaxın vaxt keçir, amma Ədliyyə Nazirliyinin əməkdaşları İsfəndiyar Axundova yaxın düşə bilmirlər. Halbu ki, çax az miqdarda bank, yaxud aliment borcu olan vətəndaş dərhal həbsə atılır.
Prezidentin vətəndaşlara ayırdığı torpaqda ərəblərə ticarət mərkəzi tikdi…
Öz təşəbbüsümzlə 17 oktyabr 2019-cu il tarixdə İsfəndiyar Axundovla görüşərək, dövlət başçısının göstərişi ilə zərəçəkənlər üçün ayrılmış Yeni Yasamal Massivi, Kənar dairəvi küçəsi (hazırda Məhəmməd Xiyabani 11) ünvanda yerləşən 4 hektar torpaq sahəsində hazırda inşa etdiyi və etməkdə olduğu binalardan mənzillərimizi tələb edərkən o, bizə bu cavabı verdi – “mən onları ərəblərə satmışam”. İllər uzunu minbir əziyyətlə, dişi-dırnağıyla topladığı vəsaiti ödəyib, ailələri üçün mənzil almaq arzusunda olmuş Azərbaycan vətəndaşlarını kirayələrdə dözülməz məhrumiyyətlərə məhkum etmiş və hazırda qapısından əliboş qaytaran İsfəndiyar Axundov, onlara çatası əmlakları ərəblərə satdığını elə rahatlıqla bəyan edir ki, sanki dövlət başçısı hörmətli Prezident İlham Əliyev Cənabları bu torpaq sahəsini və küllü miqdarda vəsaiti zərərçəkənlər üçün yox, onun şəxsi istək və arzuları üzrə istifadəsi üçün təyin etmişdir.
Növbəti stansiya Konstitusiya Məhkəməsi: qapılar bağlanacaqmı?
Cəzasızlıqdan əmin olan İsfəndiyar Axundov o qədər irəli gedibdir ki, bizim işimizlə bağlı törətdiyi mənzil dələduzluğuna Azərbaycan Respublikası Konstitusiya Məhkəməsini daxil edərək bu məhkəmənin əli ilə dələduz əməllərinə hüquqi don geydirmək istəyinə düşmüşdür. İki ay əvvəl Bakı Appelasiya Məhkəməsinə, sonra Azərbaycan Respublikası Ali Məhkəməsinin Plenimuna müraciət edərək hər ikisindən rədd cavabı almış “Şərur” MTK-nın sahibi İsfəndiyar Axundov bütün gücü ilə yeni qaranlıq yollar arayışındadır…
Demək olar ki, əhalinin əksər hissəsi müxtəlif xəstəliklərdən əziyyət çəkir. Hansı xəstəxanaya, poliklinikaya girirsən, xəstə əlindən tərpənmək olmur. Apteklərdə dərman alan insanların sayı-hesabı bilinmir. Əksər evlərdə, dolabları, soyuducuları, masaların üzərini torba-torba dərmanlar “bəzəyir”. Bu qədər dərmanların müqabilində isə xəstəliklər sağalmır ki, sağalmır.
Tanınmış həkim, tibb elmləri namizədi Rəşid Mahmudov AYNA-ya müsahibəsində insanlarımızı pərişan edən, həkim qapılarına ayaq döydürən xəstəliklərin səbəblərinə aydınlıq gətirib, xəstəliklərdən qorunmağın yollarını açıqlayıb.
- Doktor, niyə xəstəxana qapılarından asılı qalmışıq?
- Bunun bir çox səbəbləri var, ancaq ən başlıca səbəbi qidalarımızın normal olmamasıdır. Yediyimiz ən bahalı “Ankor” yağının tərkibinə belə, palma yağı qatılır. Ölkəmizdə satılan yağların tərkibinin 70-80 faizi palma yağından ibarətdir. Qidaların da 99 faizinə insan sağlamlığına zərərəli yağlar, xüsusilə palma yağı qatılır. Baxın, gənclərimizin əksəriyyəti evlənmir, ailə quran qadınların övladları olmur, insanların çoxu köklükdən əziyyət çəkir, bunların da əsas səbəbi palma yağlarıdır. Palma yağını təkcə yağlara yox, verməşilə, makarona, hətta uşaqlar üçün nəzərdə tutulmuş qatılaşdırılmış südə belə, qatırlar. Bu da insanların kiçik yaşlardan başlayaraq xəstələnməsinə səbəb olur. Xəstəliklərin artmasının digər səbəbləri isə ekologiya və güzəranımızın zəif olmasıdır. Bu üç səbəb bu gün xəstə insanların çox olmasına təkan verir.
- İnsanların əksəriyyəti dərmanlarla müalicənin effektli olmadığından gileylənir. Dərmanların keyfiyyətsiz olduğunu deyə bilərikmi?
- Dərmanların əksəriyyəti keyfiyyətsizdir, bəli. Buna səbəb də dərman firmalarının sahibləridir. Onların əksəriyyəti dərman istehsal edən şirkətlərə sifariş verəndə dərmanların tərkibindəki maddələrin dozasını azaldırlar. Məsələn, dərmanın tərkibində hansısa maddə 50 milliqram olmalıdır, ancaq bunlar 5 milliqramın pulunu ödəyirlər, ancaq burda satanda 50 millqramın pulunu alırlar. Ona görə də dərmanlar həm bahadır, həm də keyfiyyətsiz. O cümlədən, bizim millətdə tənbəllik var, bir yerimiz ağrıyan kimi yox, ancaq yıxılanda həkimə gedirik. Bunun səbəbi səhlənkarlıqla yanaşı həm də kasıblıqdır. Xəstəlik irəliləyəndə dərmanın da effekti az olur, sağalma prosesi uzun çəkir.
- İnsanlarımız artıq həkimlərə də inanmırlar...
- Dərmanların keyfiyyətsiz olduğuna görə insanların həkimlərə olan inamı da itib. Ancaq ölkəmizdə, həqiqətən də çox güclü, istedadlı həkimlər var. Mən özüm ölüm ayağında olan xəstə idim, kəskin pankreatitdən əziyyət çəkirdim, xəstəlik ildırım sürətilə irəliləyirdi. Məni öz həkimlərimiz sağaltdı, daha doğrusu, ölümdən qaytardılar. Özüm belə, inanmırdım ki, sağalaram. Ona görə də savadlı həkimlərimizin haqqına girə bilmərəm. Düzdür, savadsız, insana pul kimi baxan həkimlərimiz də var, ancaq qurunun oduna yaşı da yandırmaq olmaz, bütün həkimlərə çamur atmaq doğru deyil.
- Xəstələrin əksəriyyəti dərmanlardan bezdiyini və təbii üsullarla müalicəyə başladıqlarını bildirirlər. Bütün xəstəlikləri xalq təbabəti ilə müalicə etmək mümkündürmü?
- Bütün dərmanların tərkibində təbii komponentlər var. Məsələn, prostat vəzinin iltihabı xəstəliyində xəstələrə prostamol tipli dərmanlar yazılır. Həmin dərmanların hamısının tərkibi boranı tumunun içindəki yaşıl pərdədən ibarətdir. Bu xəstəlikdən əziyyət çəkənlər bir kilo boranı tutumu alıb ət maşınından çəkərək yesələr, eyni effekti verəcək. Adicə mədə xorası xəstəliyində gənəgərçək yağından, bağayarpağı bitkisindən istifadə etmək çox faydalıdır. Bağayarpağının tərkibində həm zəhərli, həm də xeyirli maddələr var. Ona görə də təbii üsullarla müalicə edəndə çox diqqətli olmaq lazımdır. Bəzən insanlara bağayarpağı dəmləməsi məsləhət görürlər, içir, müəyyən qədər yaxşılaşır. Ancaq eləsi olur ki, dozanı aşır, bir stəkan əvəzinə bir çaynik bağayarpağı dəmləməsi içir və bağayarpağının tərkibindəki zəhərdən reanimasiyalıq olur. Ancaq bütün xəstəlikləri təbii üsullarla müalicə etmək qeyri-mümkündür.
- Doktor, onkoloji xəstələrin də sayı çoxalıb, həmçinin xəstəlik, sanki cavanlaşıb, uşaqlar arasında belə, yayılıb. Sizcə, bunun səbəbi və ya səbəbləri nədir?
- Biz tələbə olanda, 55 yaşdan aşağı heç kimdə xərçəng aşkar olunmurdu. İndi xərçəng, həqiqətən də cavanlaşıb. Xərçəng xəstəliyi ilə bağlı 400 nəzəriyyə var, hər boş kəllədən bir cümlə çıxıb. Biri deyir, "alüminium qabda yemək xərçəngə səbəb olur", digəri deyir, "üstü kirəmitli evdə yaşamaq", başqa birisi tam fərqli səbəb göstərir və s. Heç kim də heç kimin nəzəriyyəsini qəbul etmir. Xərçəngin cavanlaşmasının səbəbini isə konkret bir məsələnin üstünə atmaq mümkün deyil.
- İddia edirlər ki, xərçəng hüceyrəsi, əslində bütün insanlarda var, müxtəlif səbəblərdən həmin hüceyrə oyana bilər. Bu iddia nə qədər həqiqəti əks etdirir?
- Bədənizmidə xərçəng hüceyrəsinin olduğunu demək doğru olmaz. Xərçəng bədənimizdə olan hüceyrələrdən deyil, optik hüceyrədir və heç bir hüceyrəmizə oxşamır. Optik toxuma özünə angiogenin yaradır, yəni magistral damardan damar çəkir. Xəstəlik magistral damarla onun arasındakı məsafədən asılı olaraq, 12, 9, 6, bəzən isə 2-3 ilə əmələ gəlir. Əslində, bədənimizdə timusdan asılı limfositlər var, timus vəzində formalaşıb inkişaf edirlər, təbii killerlər (TK) isə genetik yad hüceyrəni məhv etməlidir. Təbii killerlər normal və aktiv olanda insan xərçəngə tutulmur, TK-lar orqanizmdə xərçəng hüceyrəsi tapan kimi udub məhv edir. Amma bu, o demək deyil ki, bizim əlimizdə TK-ları aktivləşdirən, miqdarını çoxaldan hər hansı dərman olsa, xərçəngi müalicə edə bilərik. Çünki təbii killerləri sonradan bərpa etmək olmur, orqanizmdə nə qədər yaranıbsa, o qədər də qalacaq. 90, 100, 105 il yaşayıb qocalıqdan ölən insanlar var, onların hüceyrələrində deqredasiya gedir, hüceyrələr öz funksiyasını yerinə yetirə bilmir, nəticədə xərçəngə çevirir. Yəni qocaların, demək olar ki, hamısı xərçəngdən ölür.
- Bəzi şəxslər də iddi edirlər ki, xərçəng İsrail dövlətinin bilərəkdən yaratdığı bir xəstəlikdir və ancaq özləri bu xəstəliyin müalicəsini bilirlər. Bu iddialar barədə nə deyə bilərsiniz?
- Bunlar boş-boş dedi-qodulardır. Ələkbər Məmmədov adlı futbolçu var idi, deyirdilər ki, guya o, meymunun qarnını cırıb, ona görə də ona sağ ayağı ilə top vurmağa icazə vermirlər. Halbuki Ələkbər Məmmədov cılız kişi idi, burnunu tutsan, canı çıxardı. Xərçənglə bağlı yayılan belə fikirlər də ona bənzər əfsanələrdir.
- Stress, əsəb, gərgin iş qrafiki xərçəngə səbəb olurmu?
- Desək ki, konkret bunlar səbəbdir, aldatmış olarıq. Elm çox ciddi qanunlara tabedir, elmi əsası olmayan fikrə inanmaq doğru deyil. Xərçəngdən əziyyət çəkən 3 yaşlı uşaqda stress nə gəzir?! Bu fikirlər də, sadəcə cəfəngiyyatdır.
- Son olaraq, bəs xəstəliklərdən necə qorunaq?
- Xəstəliklərin qarşısını almaq üçün ilk növbədə özümüz mübarizə aparmalıyıq. Ekologiyamızı qorumalıyıq, qidalarımıza diqqət yetirməliyik. Dünyada bizdən başqa heç bir dövlət palma yağı almır. Azərbaycan isə ildə 50 min ton palma yağı alır. Özümüz özümüzü məhv edirik. Qida Təhlükəsizliyi Agentliyi bu məsələyə xüsusi diqqət yetirməlidir. Ümumiyyətlə, Prezident ölkəyə qida yağının gətirilməsinin dayandırılması barədə göstəriş verməlidir.
"Sumqayıt-Bakı sərnişin qatarında sıxlığı mən də müşahidə etmişəm. Özüm gedib-gəlmişəm, sərnişin sıxlığı var".
"Ölkə.Az" azvision.az-a istinadən xəbər verir ki, bunu "Azərbaycan Dəmir Yolları” QSC-nin sədri Cavid Qurbanov bu gün Yeni Azərbaycan Partiyasının qərargahında keçirilən mətbuat konfransında deyib.
Qurum rəhbəri bildirib ki, Bakı dəmir yolu xətti yalnız sərnişin daşımır, buradan həm də yük daşınır: "Məcburuq ki, səhər saat 11-ə qədər, axşam 4-dən sonra sərnişin daşınsın. Güzdək-Sahil yolunun yenilənməsi ilə əlaqədar Biləcəridə çeşidləmə stansiyasını, Şirvan və Ələt stansiyalarını köçürəcəyik. Bununla da Bakının xətlərinin sərnişinlərə xidmət etməsi üçün hazırlayacağıq. Buna bir qədər vaxt lazımdır. Bakı-Abşeron dairəsində 6 qatar çalışırdı. Bu gün 2 yeni qatar gətirilib. Dairə açılanda qatarın yolu uzanacaq. Qatar bütün dairəni gedəcəyi üçün həm məsafə intensivləşəcək, həm də yeni qatarlar cəlb edəcəyik. Qatar sayını artırmaqla sıxlığın qarşısını almış olacağıq. Bu gün ayrı-ayrı istiqamətlərə qatar gedir. Ona görə bu il belə ötüşdürəcəyik".
C.Qurbanov qeyd edib ki, yeni qatarlar 2021-ci ildən gəlməlidir: "Amma gələn il "Ştadler" kompaniyası ilə danışıqlar aparacağıq ki, 1 və ya 2 qatarın gətirilməsinə nail olaq. Onu götürəndən sonra sıxlıq aradan qaldırılacaq".
Prezident İlham Əliyevin müvafiq Fərmanı ilə bu il nazirliyin tabeliyində DOST Agentliyinin və ilk DOST Mərkəzinin yaradılması 2019-cu ilin mühüm sosial uğurlarından biridir.
Bu ay daha bir DOST Mərkəzinin, eyni zamanda yeni sosial xidmət və reabilitasiya müəssisələrinin istifadəyə verilməsi təmin olunacaq.
BAKU.WS xəbər verir ki, bunu Əmək və Əhalinin Sosial Müdafiəsi naziri Sahil Babayev Nazirliyin Kollegiyasının növbəti iclasında bildirib.
O, vurğulayıb ki, Birinci vitse-prezident, Heydər Əliyev Fondunun prezidenti Mehriban xanım Əliyevanın təşəbbüsü olan DOST layihəsi dövlət sosial xidmətləri sahəsində vətəndaş məmnunluğunun təminatına imkan verib. DOST Mərkəzinin xidmətlərinin sayı artıq 132-ə çatıb və həmin xidmətlərdən artıq 115-nin pasportları da hazırlanıb.
Nazir bildirib ki, 2019-cu ildə nazirlik üçün prioritet istiqamətlərdən biri də sosial təminat sahəsi üzrə xidmətlərin elektronlaşdırılması olub.
Bu ilin ötən dövründə artıq 10 sosial təminat növü, o cümlədən 2 pensiya, 8 müavinət və təqaüd növünün təyinatının elektronlaşması təmin edilib.
Ümumilikdə bu ayın sonuna qədər digər bir çox müavinət və təqaüdlərin də avtomatlaşdırılması başa çatdırılacaq.
Nəticədə il ərzində 180 min təyinatın e-qaydada, proaktiv şəkldə həyata keçirilməsi təmin olunacaq.
S.Babayev şəhid ailələri və müharibə əlillərinin mənzillə, müvafiq kateqoriyalara aid əlilliyi olan şəxslərin avtomobillə təminatı tədbirlərinin də davam edəcəyini, bu ay da yeni mənzillərin, avtomobillərin təqdim ediləcəyini deyib.
O, 2019-cu ilin ötən dövründə özünüməşğulluq proqramına cəlb edilənlərin sayının 10,6 minə çatdığını, onlardan böyük əksəriyyətinin artıq aktivlə təmin olunduğunu qeyd edib.
Nazir ünvanlı dövlət sosial yardımı sisteminin təkmilləşdirilməsi işlərindən bəhs edib. Bildirib ki, sosial yardımın alınması üçün müraciət etmiş ailələrin DOST mərkəzlərinin əməkdaşları tərəfindən maddi-məişət şəraitinin müayinəsi zamanı xidməti davranış normaları da müəyyən edilib.
Bu normalar və onlara əməl edilməsi ilə bağlı münasibətləri əhatə edən Yaddaş Kitabçası hazırlanıb. Maddi-məişət şəraitinin müayinəsi məhz həmin normalara riayət prinsipi əsasında həyata keçiriləcək.
İclasda DOST mərkəzlərində göstərilən xidmətlər üzrə pasportların təsdiq edilməsi barədə, ünvanlı dövlət sosial yardımının alınması üçün müraciət etmiş ailələrin DOST mərkəzlərinin əməkdaşları tərəfindən maddi-məişət şəraitinin müayinəsinin həyata keçirilməsi ilə bağlı Yaddaş Kitabçasının layihəsi barədə çıxışlar olub.
2020-ci il üçün iş vaxtı normasının və istehsalat təqviminin layihəsi, “Məcburi dövlət sosial sığorta haqqının toplanması Qaydaları” və “Məcburi dövlət sosial sığortası üzrə sığorta iştirakçılarının uçotu Qaydaları” layihələri barədə məlumat verilib.
İclasda qeyd edilən layihələr, habelə bir sıra cari məsələlər müzakirə edilib, qərarlar qəbul olunub.
Bakı Apellyasiya Məhkəməsində psixoloq Nərmin Şahmarzadənin barəsində olan qərardan verilən apellyasiya şikayəti üzrə məhkəmə başa çatıb.
"Ölkə.Az" oxu.az-a istinadən xəbər verir ki, hakim Elmar Rəhimovun sədrliyi ilə keçirilən prosesdə qərar elan olunub.
Qərara əsasən, N.Şahmarzadənin şikayəti təmin edilməyib. Xətai Rayon Məhkəməsinin qərarına əsasən, o, Xətai rayonu ərazisində küçə süpürəcək. N.Şahmarzadə 400 saat ictimai işlər cəzası alıb.
İttihama görə, N.Şahmarzadə “Facebook” profilində Milli Qəhrəman Mübariz İbrahimovu təhqir edib. Daha sonra M.İbrahimovun anası Şamama İbrahimova psixoloqu xüsusi ittiham qaydasında məhkəməyə verib, onun cəzalanmasını istəyib.
Xatırladaq ki, Azərbaycan Silahlı Qüvvələrinin giziri M.İbrahimov 2010-cu il iyunun 18-də cəbhənin Tərtər rayonu Çaylı kəndi istiqamətində Ermənistan Silahlı Qüvvələrinin hücumunu dəf edərkən bir neçə erməni əsgərini öldürərək həlak olub.
İcbari sığorta yalnız çıxarışı olan evlərə aiddir.
"Ölkə.Az" xezerxeber.az-a istinadla xəbər verir ki, 2020-ci il yanvarın 1-dən etibarən evlərin icbari qaydada sığortalanmasına başlanacaq.
İcbari Sığorta Bürosunun icraçı direktoru Rəşad Əhmədov bildirib ki, yalnız qeydiyyatı olan evlər və obyeklər icbari qayadada sığortalanacaq. Lakin qeydiyyatı olan tikililərdən də icbari sığortaya cəlb edilməyənləri var.
Çıxarışı olan fərdi yaşayış evlərinin də icbari qayadada sığortalanmasında heç bir problem yaranmayacaq. Çünki burada əmlakın qiymətləndirilməsinə ehtiyac yoxdur.
Rəşad Əhmədov deyib ki, evlərin qeydiyyata alınması həm sığorta sektoru üçün, həm də fövqəladə risklər baxımından olduqca önəmlidir. Bu səbəbdən çıxarışı olmayan evlərin də sürətli şəkildə qeydiyyata alınmasına ehtiyac var.
Evini sığorta etdirməyənləri 30 manat cərimə gözləyir. Həmin şəxs cərimə olunduqdan sonra 20 gün ərzində icbari sığorta müqaviləsi bağlamasa yenidən cərimələnə bilər.
Ailə başçısını itirməyə görə sosial müavinətin təyin edilməsi ilə əlaqədar istisna hal müəyyənləşdirilib.
Turkustan.info-nun məlumatına görə, bu, Prezident İlham Əliyevin bu gün təsdiqlədiyi “Sosial müavinətlər haqqında” və “Əmək pensiyaları haqqında” Qanunlara edilən dəyişikliklərdə əksini tapıb.
“Əmək pensiyaları haqqında” Qanuna edilən dəyişikliyə əsasən, ailə başçısını itirməyə görə hesablanmış əmək pensiyasının sığorta hissəsinin onlardan hər birinə düşən məbləği “Sosial müavinətlər haqqında” Qanun ilə müəyyən edilmiş ailə başçısını itirməyə görə sosial müavinətlərin məbləğindən az olduqda, əmək qabiliyyəti olmayan ailə üzvlərinin hər biri ailə başçısını itirməyə görə pensiya əvəzinə ailə başçısını itirməyə görə sosial müavinət almaq hüququna malik olacaq.
“Sosial müavinətlər haqqında” Qanuna edilən dəyişiklik də “Əmək pensiyaları haqqında” Qanuna təklif edilən dəyişikliklə əlaqədardır. “Əmək pensiyaları haqqında” Qanuna təklif edilən dəyişiklikdə nəzərdə tutulan həmin şəxslərə ailə başçısını itirməyə görə sosial müavinətin 2020-ci il yanvarın 1-dən əvvəlki dövr üçün təyin edilməsinə, yenidən hesablanmasına yol verilməyəcək.
Bu müddəa gələn il yanvarın 1-dən qüvvəyə minəcək.
Qeyd edək ki, yaşa görə əmək pensiyası almaq hüquq verən yaş həddinin artırılması nəticəsində ümumi və güzəştli şərtlərlə yaşa görə əmək pensiyası və sosial müavinət almaq hüququ verən yaşlar arasında ciddi uyğunsuzluq yaranıb və bu uyğunsuzluqların aradan qaldırılması zərurəti yaranıb. Sosial müavinətlər haqqında qanuna edilən dəyişikliklər məhz ailənin maddi durumunun yaxşılaşması məqsədi ilə ona ailə başçısını itirməyə görə pensiya və ya sosial müavinət seçmək hüququnun verilməsi məqsədi daşıyır.