Son xəbərlər

Azərbaycanın bir sıra şəhər və rayonlarında tətbiq edilən sərtləşdirilmiş xüsusi karantin rejimində evdən çıxma icazəsi olan şəxslər istisna olmaqla, digər şəxslərin yaşayış yerini və ya olduğu yeri tərk etmələri icazə əsasında həyata keçirilir.

“Report” xəbər verir ki, icazələr təxirəsalınmaz tibbi zərurətlə və ya qrafik üzrə müalicə almaqla əlaqədar, ərzaq və digər gündəlik tələbat mallarının, dərman vasitələrinin alınması, dövlət xidmətlərinin, bank, poçt və fəaliyyətinin davam etdirilməsinə icazə verilən iş və xidmət sahələrində göstərilən digər xidmətlərdən istifadə edilməsi zərurəti, həmçinin açıq havada vaxtın keçirilməsi ilə əlaqədar verilir.

Belə ki, 1 rəqəmi – təxirəsalınmaz tibbi zərurətlə və ya qrafik üzrə müalicə almaqla əlaqədar yaşayış yerini və olduğu yeri tərk etmək üçün (icazə rayon və şəhər daxilində 2 (iki) saat müddətinə verilir, rayonlar və şəhərlərarası hərəkət zərurəti yarandıqda olduğu ünvanla getməli olduğu ünvan arasında məsafə və müalicə prosedurunun müddəti nəzərə alınır, geri qayıtma müddəti həkim tərəfindən verilən arayışla müəyyən edilir və zərurət olduqda polis əməkdaşlarına təqdim edilir).

Prezident yanında Vətəndaşlara Xidmət və Sosial İnnovasiyalar üzrə Dövlət Agentliyindən “Report”a bildirilib ki, gün ərzində 1 indeks üzrə alınan icazələrin sayına görə məhdudiyyət nəzərdə tutulmayıb. Qeyd olunub ki, 1 rəqəmindən icazələrin sayına təxirəsalınmaz tibbi zərurətlə əlaqədar olduğu üçün məhdudiyyət tətbiq edilməyib.

“Çünki vətəndaşın gün ərzində qrafik üzrə bir neçə dəfə müalicə alması mümkündür”, – deyə məlumatda bildirilib.

2 rəqəmi vasitəsilə icazə isə ərzaq və digər gündəlik tələbat mallarının, dərman vasitələrinin alınması, dövlət xidmətlərinin, bank, poçt və fəaliyyətinin davam etdirilməsinə icazə verilən iş və xidmət sahələrində göstərilən digər xidmətlərdən istifadə edilməsi zərurəti, həmçinin açıq havada vaxtın keçirilməsi ilə əlaqədar yaşayış yerini və olduğu yeri tərk etmək üçün (icazə 2 (iki) saat müddətinə gündə 1 dəfə verilir, dövlət xidmətlərindən istifadə edilməsi zərurəti ilə əlaqədar yaşayış yerini və olduğu yeri tərk edən şəxslər üçün geri qayıtma müddəti müvafiq dövlət qurumu tərəfindən verilən arayışla müəyyən edilir).

Yaxın qohumun dəfnində iştirak üçün vətəndaşlar Daxili İşlər Nazirliyinin 102 qaynar xətti ilə əlaqə saxlamalıdırlar.

Bundan başqa, Dövlət Agentliyinin sədri Ülvi Mehdiyev Nazirlər Kabineti yanında Operativ Qərargahın iyunun 20-də keçirilən brifinqində gün ərzində SMS icazə sistemi vasitəsilə 1 kodundan istifadə edən şəxsin 2 kodundan da istifadə edə bilməsinin mümkün olduğunu vurğulayıb. Dövlət Agentliyinin sədri bununla yanaşı, vətəndaşları sui-istifadə hallarına yol verməməyə, yalnız zəruri hallarda və təyinatı üzrə SMS icazə sistemindən istifadə etməyə çağırıb. Sui-istifadə hallarına yol verilməsinin isə karantin rejiminin pozulması kimi qiymətləndiriləcəyi və bununla bağlı qanunvericiliyin tələbinə uyğun tədbirlər görüləcəyi bildirilib.

Bundan əlavə, koronavirus testinin cavabı pozitiv çıxdığı üçün evdə müalicəyə cəlb olunan və özünütəcrid rejimində olan şəxslərin SMS icazə sistemindən istifadəsi mümkün olmayacaq.

Həmin şəxslərin siyahısı Tibbi Ərazi Bölmələrini İdarəetmə Birliyi (TƏBİB) tərəfindən Dövlət Agentliyinə təqdim edilib.

Qeyd edək ki, Bakı, Sumqayıt, Gəncə, Lənkəran, Yevlax, Masallı, Cəlilabad şəhərlərinin və Abşeron rayonunun ərazisində xüsusi karantin rejimi 21 iyun saat 00:00-dan 5 iyul saat 06:00-dək sərtləşdirilib.

Çoxlu su için: koronadan qoruyur

Sosial şəbəkələrdə yaponiyalı alimlərin apardığı araşdırma ilə bağlı video-süjet yayılıb. Bildirilir ki, alimlər koronavirusa yoluxmamaq üçün hər 15 dəqiqədən bir bir neçə qurtum su içməyi məsləhət görürlər. Bu yolla nəfəs yoluna daxil olan virus qida borusundan mədəyə yönləndirilir və mədədə məhv olur. Əks təqdirdə isə virusun nəfəs borusundan ağciyərlərə daxil olması və bu orqanı zədələməsi ehtimalı artır.
Yayılan bu məlumatla bağlı Axar.az-a açıqlama verən professor Adil Qeybulla bildirib ki, ağız və boğazın nəmli olması virusun məhv olmasına səbəb ola bilər.

"Viruslar ilkin olaraq nəfəs yollarından bədənə daxil olurlar. Nəfəs yoluna daxil olan virus replikasıya olaraq, yəni öz sürətini yaradaraq hüceyrə xaricinə çıxır. Onlar bu cür artıb, çoxalırlar. Hüceyrədə artıb bayıra çıxan virusları nəmli boğaz mədəyə yuyub aparır. Əks halda həmin viruslar nəfəs yollarından bəlğəm vasitəsi ilə aşağı tənəffüs yollarına irəliyə bilərlər. Ona görə də boğazın nəmli olması şərtdir. Hər dəfə su içdikdə xaricə çıxan virusları su yuyub mədəyə aparır. Mədə şirəsinin təsirindən isə viruslar məhv olur. Bu baxımdan yayılan məlumat həqiqəti əks etdirir", - həkim qeyd edib.

Maskanın taxılması bizim yeni həyat tərzimizdir. Bir həkim, vətəndaş kimi bundan istifadə etməyinizi sizdən xahiş edirəm.

Bunu TƏBİB-in xəstəliklərin profilaktikası və kontrolu şöbəsinin müdiri Yaqut Qarayeva Operativ Qərargahın bugünkü brifinqində deyib: “Hər bir insan özünü qorumalıdır. Yaxınlarınıza, əzizlərinizə görə özünüzü qoruyun. Artıq maskasız qarşıdakı aylar, illərdə həyatımız olmayacaq. Bütün Avropa ölkələri, Asiya ölkələri də bu qaydalarla hərəkət edirlər. Biz dəfələrlə bildirdik ki, yumşalmaya gedib normal həyata qayıtmaq istəyirik. Amma bu maskasız mümkün deyil. Maska həyatımızın parçasıdır”.

O bildirib ki, sosial məsafəni qorumaq da vacib olan qaydalar sırasındadır: “Paralel olaraq əl gigiyenasına diqqət etmək lazımdır. Bunun rayon, şəhər fərqi yoxdur. Rayonlarda insanlar virus yox imiş kimi hərəkət edirlər, sanki bu virus yalnız Bakı və Sumqayıtda var. Virus sərhəd, yaş, sosial təbəqə tanımır. Virusun yaşaması üçün insan orqanizminə ehtiyacı var”.

Yaqut Qarayeva əlavə edib ki, hazırkı vəziyyət aprel və may aylarından fərqlənir: “Biz hazırda asimptomatik xəstələri az görürük. Artıq başqa ölkələrin praktikasına ehtiyacımız yoxdur. Orta yaşlı xəstələrimizdə çox ağır keçən pnevmaniya görürük”.

TƏBİB rəsmisi xalqa müraciət edərək, vəziyyəti ələ almağın onlardan asılı olmadığını deyib: “Hər kəs özünü və ailəsini qorumalıdır. Başqa yolumuz yoxdur”.

Mərkəzi Gömrük Hospitalının rəsmi tərəfdaşı olan “Florence Nightingale” Xəstəxanalar Qrupunun həkiminin COVID-19 xəstələrinin müalicəsi ilə bağlı tövsiyələr verib.
 
“Şişli Florence Nightingale” xəstəxanasında koronaviruslu xəstələri müalicə edən azərbaycanlı həkim Suada Qasımova koronavirusun insanlarda müxtəlif klinik simptomlarla özünü biruzə verdiyini deyir. Onun sözlərinə görə, ən çox rast gəlinən klinik simptomlar quru öskürək və təngənəfəslikdir. Eyni zamanda, bunlarla yanaşı xəstələrin müəyyən bir qismində oynaq ağrıları da müşahidə edilir. Nadir hallarda klinik simptomlar sırasında ağız dadında və qoxu almada dəyişiklik müşahidə edilir.
 
Bu şikayətlərlə gələn xəstələrdə koronavirusdan şübhələnmək və diaqnostika məqsədilə mütləq PCR testi etmək lazımdır. PCR testi ilə birlikdə mütləq hər 2 ağciyərin rentgenoqrafiyası çəkilməlidir. PCR testinin nəticəsi neqativ olarsa və yüksək dərəcədə COVID-19 şübhəsi olarsa, xəstəyə aşağı dozada ağciyərlərin KT müayinəsi edilməlidir. Ağciyərlərin KT görüntüsündə buzlu şüşə görünməsi koronavirus diaqnozunda ən vacib və spesifik kriteriyadır. Antikor testləri Elisa ilə birlikdə olmadığı təqdirdə diaqnostika etibarlı deyildir.
 
“Diaqnoz qoyulan xəstələrin xəstəxanaya yatışına qərar verərkən istifadə olunan ən mühüm göstərici oksigen saturasiyasıdır. Saturasiyası normal olan xəstələrdə hər 2 ağciyərin yarısından çoxunda tutulma varsa, xəstəxanaya yerləşdirilməsi doğru bir yanaşmadır.Bundan başqa, ümumi vəziyyəti yaxşı olan bəzi qadın xəstələrə, həkimin klinik qərarına görə yatış qərarı verilə bilər.
 
Hal-hazırda xəstəxanaya yerləşdirilməyən xəstələrə edilən ən vacib müalicə Plaquenil müalicəsidir. Plaquenillə birlikdə xəstəni ikincili bakterial super infeksiyadan qorumaq məqsədilə müalicəyə sefalosporin ve flüorokinolon qrupundan olan bir antibiotik əlavə oluna bilər. Xəstəxanaya yerləşdirilən xəstənin müalicəsində isə Plaquenillə birlikdə xüsusilə ağciyərlərdə yayılmış tutulma olan xəstələrdə Favipiravir preparatı istifadə edilməlidir.
 
Bu ikili müalicəyə baxmayaraq tənəffüs sistemi göstəriciləri düzəlməyən xəstələrdə MAS göstəriciləri varsa, yəni, limfopeniya müşahidə olunursa, d-dimer, ferritin və İL-6 yüksəkdirsə, onda bu xəstələrdə müalicədə Actemra kimi İL-6 reseptor antaqonist preparatı tətbiq olunur. Bunları istifadə edərkən ilk gün yüklənmə dozası, ikinci və üçüncü gün 2. və 3. dozalar verilərək müalicəyə son verilir.
 
Ağciyərlərdə yayılmış tutulma olan xəstələrdə tənəffüs sistemi problemlərinin düzəlmədiyi və radiyoloji göstəricilərin artdığı təqdirdə xəstədə kök hüceyrə ilə müalicə düşünülməlidir. Kök hüceyrə müalicəsində ən ideal üsul 4 gün müddətində gündə bir dəfə olmaqla damardaxili və bir dəfə bronxoskopiya vasitəsilə bronxial kök hüceyrəsi verməkdir”.
 
Həkim qeyd edib ki, steroid preparatları ilə müalicə zamanı tənəffüs problemləri yüksək olan xəstələrə hər kq çəkiyə ən çox 2 mq. dərman verilməlidir. Ağciyər fibrozunun qarşısını almaq məqsədi ilə istifadə edilən ən vacib müalicə də kök hüceyrə müalicəsidir. Bu fibroz KT-də bal pətəyi görüntüsü şəklində görülür. Ən vacib simptom kəskin respirator distress sindromudur və bu zaman xəstəyə supin pozisiyası verilməlidir.
 
Beləliklə Covid-19 xəstələrinin müalicə və diaqnostikasında kompleks yanaşma tətbiq edilməli və xəstənin ümumi vəziyyətinə uyğun olaraq həkimin təyinatları davam etdirilməlidir.  /BakuPost/
Baxış sayına görə TikTok YouTube-u keçmək üzrədir

Tədqiqatlar nəticəsində məlum olub ki, 4 yaşdan 15 yaşadək uşaqlar günün orta hesabla 80 dəqiqəsini TikTok-da keçirirlər.
Ted.az bildirir ki, YouTube-da bu göstərici 85 dəqiqədir.

Tədqiqat üçün keçirilən sorğuda ABŞ, Böyük Britaniya və İspaniyadan 60 000 ailə iştirak edib.

Nəzərinizə çatdıraq ki, 2020-ci ildə karantin dönəmində populyar platformanın uşaqlar arasında istifadə faizi 200% artıb.

“WhatsApp”da yeni maraqlı funksiya işə salınır
“Facebook” “WhatsApp” mesajlarına aid olan mübadilə üçün proqram platformasında elektron ödənişlər xidmətinin işə salınmasına başlayıb.

Bu barədə “Facebook” şirkətinin banisi və rəhbəri Mark Çukerberq bildirib. 

O, qeyd edib ki, proqramın yeni imkanlarını ilk olaraq Braziliyadan olan istifadəçilər qiymətləndirəcəklər.

"Bu gün biz Braziliyada “WhatsApp” istifadəçiləri üçün ödənişlərin işə salınmasına başlayırıq. Göndərilmə və pulun alınması footların mübadiləsi kimi sadə olacaq. Biz həmçinin kiçik biznesə birbaşa “WhatsApp”da satışları həyata keçirməyə icazə verəcəyik", - o özünün “Facebook”dakı səhifəsində yazıb.

Bakını bir də belə görün...
Koronavirus pandemiyası ilə əlaqədar ikigünlük sərt karantin rejimi tətbiq olunduğundan Bakı küçələri tamamilə bomboş qalıb.

Qafqazinfo xəbər verir ki, adi günlərdən fərqli olaraq, indi paytaxt küçələrində insana tək-tük halda rast gəlmək olur. Onlar da ya müvafiq icazəsi olanlar, ya da itlərini gəzdirmək üçün küçəyə çıxanlardır.














2020-ci il Avstraliyadakı meşə yanğınları ilə başladı və fərqli dəhşətlərlə var gücü ilə davam edir.
 
Bir müddət əvvəl sosial şəbəkələrdə maraqlı video yayılıb. Belə ki, “Zenlocc” adlı İnstagram hesabının 21 aprel 2015-ci ildə paylaşdığı videoda 2020-ci il olduğu kimi təsvir edilib. Milyonlarla insanın izlədiyi video 1 dəqiqədən qısadır.
 
Video Azadlıq heykəlinin ağzı maskalı görüntüləri ilə başlayır. Daha sonra maskalı həkimlər və “Nəfəs ala bilmirəm” yazılı kadrlarla davam edir.
 
Video sürətlə yayıldığı üçün hesabın sahibi məcburən açıqlama verib. Bildirib ki, sözügedən animasiyanın orijinal versiyası “High Def” tərəfindən “2014 in One Minute” adı ilə yayımlanıb:
 
“Mən sadəcə həmin videodan müəyyən hissələr götürərək, dünyanın vəziyyətini əks etdirmişdim. Həmin illərdə də dünyanın gündəmi Ebola və oxşar etirazlar idi. Yəni mən zamanda səyahət etmirəm və ya gələcəyi görə bilmirəm. Oyanın insanlar. Tarix təkrarlanır!”
 

“WhatsApp” messencerinin yaradıcıları mesajı tarixə görə tapmağı imkan verəcək yeni funksiyanı yoxlayırlar.

Bu barədə xarici mətbuat xəbər verir.

Yenilik axtarışın keyfiyyətini artıracaq.

Xüsusilə, istifadəçilər mesajın göndərilmə və ya qəbul tarixini seçməklə istədiyi mətni tez bir zamanda tapa biləcəklər.

Bundan əvvəl, “WhatsApp” messenceri qrup zəngləri istifadəçilərinin limitini iki dəfə artırıb.  /Modern.az/

“Bəzi ölkələr COVİD-19 pasportu tələb edəcəyi ilə bağlı məlumat verib”.

Bunu Nazirlər Kabineti yanında Operativ Qərargahın keçirdiyi mətbuat konfransında çıxış edən Nəqliyyat, Rabitə və Yüksək Texnologiyalar Nazirliyi yanında Dövlət Mülki Aviasiya Agentliyinin direktoru Arif Məmmədov bildirib.

Arif Məmmədova görə, pandemiya dövründə uçuşlarla bağlı bir sıra qaydalar qəbul olunub:

“Mayın 27-də COVID-19 pandemiyası dövründə uçuşlarla bağlı müzakirələr olub və yeni qaydalar hazırlanıb. Artıq bir sıra ölkələrdə “COVID-19″ pasportunun olacağı qeyd edilib. Lakin sərnişinləri karantinə götürəcək dövlətlərdə bu karantinin kimin hesabına olacağı bəlli deyil”.  /Yenicag.az/