Respublikamızın iri sənaye və kənd təsərrüfatı rayonlarından biri olan Abşeron ölkəmizin sosial-iqtisadi , ictimai-siyasi, mədəni həyatında hər zaman xüsusi rol oynamışdır.

Bu gün də bu gözəl ənənə davam etməkdədir.

Belə ki, hal-hazırda rayon ərazisində tikinti-quruculuq, abadlıq, səliqə-səhman işləri öz yüksək axarı ilə davam etməkdədir. Ayrı-ayrı qəsəbə və kəndlərdə, rayon mərkəzində aparılan təmir-tikinti, quruculuq, abadlıq işləri  göz oxşayır, rayonun ümumi mənzərəsini daha da gözəlləşdirir.

     Xüsusən qeyd etmək lazımdır ki, qırx dörd gün davam edən və şanlı qələbəmizlə başa çatan İkinci Qarabağ müharibəsində Abşeron rayonu İcra Hakimiyyəti və sakinləri bütün gücü və bacarığı ilə ölkə rəhbərinin yanında oldu. Bu dövrdə hər bir kəs bu qələbədə azacıq da olsa pay sahibi olmaq üçün bir yumruğa döndü. Ön cəbhəyə, o cümlədən döyüşçülərimizin yaxınlarına, ailələrinə maddi və mənəvi dəstək o zamanlarda ən ümdə məqsədə çevrildi.

 
Hal-hazırda da bu missiya davam etdirilir. Belə ki, şəhid ailələri , qazilər , vətən müharibəsi iştirakçıları heç zaman unudulmur, yaddan çıxmır . İcra başçısı İradə xanım Gülməmmədova mütəmadi olaraq şəhid, qazi ailələrinə baş çəkir, onların qayğıları, problemləri ilə yerindəcə maraqlanır. Maddi və mənəvi dəstəyini bir an belə əsirgəmir. Şəhidlərimizin müqəddəs adlarının əbədləşdirilməsi üçün rayon ərazisində bir sıra kompleks tədbirlər həyata keçirilir. Belə ki , Xırdalan şəhərində 6 şəhidin xatirəsinə bulaq kompleksi ,  Qobu qəsəbəsində şəhid baba və nəvə-I Qarabağ müharibəsində döyüşən baba Hüseynov Gülverdi Ağahüseyn oğlu, II Qarabağ müharibəsində isə nəvə Qasımov Gülverdi Abil oğlunun xatirəsinə abidə - bulaq kompleksi, Masazır kəndində  şəhid  Dövlətov Zaur Zahir oğlunun və şəhid Hüseynov Elxan Maarif oğlunun xatirəsinə abidə-bulaq kompleksi,  Xırdalan şəhərində şəhid leytenant Məmmədov Fərid Vəlhad oğlunun (27.04.1990-26.10.2020) xatirə lövhəsi və baralyefinin inşası bu qəbildən görülən işlərdəndir. Ümumiyyətlə, qeyd etmək yerinə düşərdi ki, rayon ərazisində  I və II Qarabağ müharibəsi zamanı həyatlarını itirən 150-dən çox şəhidimizin adına küçə salınıb, həmin küçələr abadlaşdırılaraq  sakinlərin istifadəsinə verilib.

Müqəddəs amal uğurunda canından keçən, şərəfli tarix yazan vətən övladlarımızın xatirələrinin əbədiləşdirilməsi yolunda işlər hal-hazırda  davam etdirilir və gələcək də davam etdiriləcək.

   Abşeron rayonunda sanitar- epidemoloji vəziyyət də daim nəzarətdə saxlanılır.Respublikamızda aparılan vaksinasiya işi rayon ərazisində də sürətlə aparılır. İcra Hakimiyyəti COVİD-19 infeksiyasının yayılmasının qarşısını almaq məqsədi ilə ölkə ərazisində həyata keçirilən vaksinasiya prosesində vətəndaşları aktiv iştirak etməyə çağırırıq və bu işə çox ciddi nəzarət edir.       
P.S. Göründüyü kimi Abşeron rayonunda hər zaman olduğu kimi hal – hazırda da rayon ərazisində sosial-iqtisadi vəziyyətin, insanların rifah halının yaxşılaşdırılması yolunda mütərəqqi adımlar atılır. Ölkə rəhbərinin tapşırıq və sərəncamlarını ləyaqətlə yerinə yetirilir.

Lakin bəzi qaragüruh , dırnağarası media nümayəndələri bütün bunları görməzdən gələrək rayon haqqında , onun başçısı İradə xanım Gülməmmədova haqqında yalan- yalnış, şər-böhtan xarakterli cızma-qaralar yazmaqdan çəkinmir, yorulmurlar. Bütün bunlar verilən əməyə hörmətsizlik olmaqla bərabər peşə etikasına sığmayan ləyaqətsizlikdir. Təəssüf ki belə qeyri -peşəkarlar hər sahədə olduğu kimi mətbuatda da var.

Müşfiq Kişiyev