Dünyanı ağuşuna alan koronavirus , COVİD – 19 bəlası bizim ölkəmizdən də yan keçməyib.
Çox şükürlər dövlətimiz tərəfindən vaxtında həyata keçirilən təxirəsalınmaz tədbirlər nəticəsində bir sıra dövlətlərdə baş verən ağır faciələr yaşamadıq. Çünki bir olduq, birlik olduq. Doğrudur , hələ təhlükə tam keçməyib. Lakin hər şey nəzarət altındadır. Təkcə paytaxtımızda deyil , ayrı- ayrı bölgələrdə , rayonlarda da verilən qərarlar , tapşırıqlar yüksək səviyyədə icra olunub və olunmaqdadır. Belə rayonlardan biri də Hacıqabul rayonudur. Belə ki , ölkəmizdə yaşanan mövcud vəziyyətin ilk günlərindən Hacıqabul Rayon İcra Hakimiyyəti rayonda vəziyyəti tam nəzarətdə saxlayır.
Hər şeyin fövqündə insanların sağlamlığdır ki , bu da İcra hakimiyyəti tərəfindən hər zaman diqqət mərkəzində saxlanılır. Rayon mərkəzidə , ayrı – ayrı kənd və qəsəbələrdə dəfələrlə yüksək səviyyədə dezinfeksiya , işləri aparılıb və bu proses hal – hazırda da davam etdirilməkdədir. Ölkə ərazisində karantin rejiminin tətbiq edilməsindən sonra Hacıqabulda da bir qayda olaraq Nazirlər Kabineti yanında Operativ Qərargahın təlimat və tövsiyələri həyata keçirilməyə başlandı.İcra başçısı Rüstəm Xəlilov xüsusi karantin rejiminin tələblərinə ciddi şəkildə riayət olunması , sakinlər arasında fərdi qaydada maarifləndirmə işlərinin aprılması haqqında mütəmadi olaraq göstərişlər verir və bu sahədə görülən işlərə tam nəzarət edir. Xüsusi ayrılmış mobil qruplar tərəfindən şəhər, qəsəbə və kəndlərdə əhali arasında insanların evdən kənara çıxmamaları, xüsusi karantin rejiminin tələblərinə, habelə sanitar epidemioloji normalara qeyd-şərtsiz əməl olunması üçün maarifləndirmə işləri ciddi qaydada aparılır. Karantin rejiminin tələblərinə riayət edilməsi üçün rayon ərazisində fəaliyyətinə icazə verilməyən ticarət, ictimai iaşə obyektləri və mövcud olan istirahət parklarına giriş tam məhdudlaşdırılmışdır.
“ Evdə qal “ kompaniyasına qoşulan əhalinin həssas qrupuna, yaşı 65 dən yuxarı olanlara , aztəminatlı ailələrə ,karantin rejiminə görə işləməyən , ehtiyacı olan insanlara həm maddi ,sosial- tibbi , mənəvi dəstək rayonda yüksək səviyyədə həyata keçirilir. Ümumilikdə , karantin dövrü başlayandan bu günə kimi 2000- dən çox aztəminatlı ailəyə yardım edilmiş və hal–hazırda da bu aksiya davam etdirilməkdədir. Rayon İcra Hakimiyyəti başçısı Rüstəm Xəlilov mütəmadi olaraq inzibati ərazi dairəsi üzrə nümayəndəlikləri ilə video-konfrans keçirir.
Rayon ərazisində də aparılan dezinfeksiya işləri, xüsusi karantin rejiminə vətəndaşlar tərəfindən riayət olunması, kənd təsərrüfatı işlərinin gedişi və kəndlərdə yaşayan ahıl şəxslərin hərəkət məhdudiyyətlərinin təmin edilməsi vəziyyəti ilə maraqlanır , müvafiq tapşırıq və tövsiyələrini verir.
Bir sözlə , Hacıqabul rayonu bu çətin və məşəqqətli günləri geridə qoymaq , normal həyata qayıtmaq üçün bütün qüvvəsini səfərbər edir , ölkə rəhbərinə dayaq və dəstək olduğunu bir daha nümayiş etdirir.