Lənkəranın Osakücə kəndində səyyar qəbul-görüş
Lənkəran ŞİH başçısı Taleh Qaraşov oktyabrın 2-də rayonun dağlıq ərazisinin iri yaşayış məntəqələrindən olan Osakücə kəndində səyyar qəbul-görüş keçirib. Şəhər İcra hakimiyyəti başçısı aparatının rəsmilərinin, hüquq-mühafizə orqanlarının, təhsil, səhiyyə, mədəniyyət idarələrinin və xidmət təşkilatlarının rəhbər işçilərinin iştirakı ilə keçən qəbul-görüşdə vətandaşların müraciətləri dinlənilmiş, qaldırdıqları məsələlər operativ şəkildə araşdırılaraq həlli ilə bağlı tədbirlər müəyyənləşdirilib. Səyyar qəbulu razılıqla qarşılayan sakinlər çıxışlarında əvvəllki görüşlər zamanı qaldırılmış məsələlərin həlli ilə bağlı görülmüş işlərə görə də minnətdarlıq ifadə ediblər. Çıxışlarda rayonun bütün ərazilərində olduğu kimi Osakücə kəndində də sosial-iqtisadi inkişafın daha da sürətlənməsi, son illərdə kənddə yeni məktəb binasının, tibb məntəqəsinin tikilməsi, kəndin ərazisindən keçən magistral avtomobil yolunun yüksək səviyyədə təmir olunaraq asfaltlanması ölkə başçısının diqqət və qayğısının bəhrəsi kimi vurğulanıb. Qeyd olunub ki, məhz bu qayğı sayəsində Ocakücə kəndində kənd təsərrüfatının ayrı-ayrı sahələri sürətlə inkişaf edir, məhsul istehsalı artır, sakinlərin maddi-məişət şəraiti durmadan yaxşılaşır. Cari ildə kənddə təsərrüfatlarda 40 hektarda çay, 60 hektarda buğda əkilib, 309 kq barama istehsal olunub, iri buynuzlu malqaranın sayı 1890-na, xırda buynuzlu malqaranın sayı 1075-ə, arı ailələrinin sayı isə 650-yə çatdırılıb. Sakinlər şəhər İcra hakimiyyəti tərəfindən onların müraciətlərinə operativ reaksiya verilməsindən məmnun qaldıqlarını da xüsusi vurğulayıblar. Qəbul-görüşü yekunlaşdıran İcra başçısı sakinlərə xoş arzularını çatdırmaqla yanaşı müraciətlərdə irəli sürülən məsələlərin həlli ilə bağlı müvafiq tapşırıqlarını da verib.
****************
Rayonda hər bir vətəndaşın probleminə diqqətlə yanaşılır, onların həlli istiqamətində icraçı şəxslərə konkret tapşırıqlar verilir
Lənkəran şəhər icra başçısı Taleh Qaraşov hər bir vətəndaşın probleminə diqqətlə yanaşır, ilk növbədə müraciətlərin yaranması səbəblərinin aradan qaldırılması üçün ciddi tədbirlər həyata keçirir. Müraciət edən hər bir vətəndaş qrafikə uyğun olaraq Lənkəran şəhər İcra Hakimiyyətində qəbul olunur, onların qaldırdıqları problemlərin həlli istiqamətində icraçı şəxslərə konkret tapşırıqlar verilir, icra barədə vətəndaşlara rəsmi cavablar göndərilir. Vətəndaşların qəbulu bütün iş günlərində, habelə şənbə və bayram günlərində də aparılır. Aparatın özündə və yerlərdə keçirilən səyyar qəbullar zamanı qaldırılan məsələlər müsbət həll olunur, müvafiq izahatlar verilir, icrada olan müraciətlər isə nəzarətdə saxlanılır. Ötən il olduğu kimi, bu il də əhalinin sosial müdafiəsi, aztəminatlı ailələrə qayğı göstərilməsi diqqətdə saxlanılan ən vacib məsələlərdən biri olub, yaxın yaşayış məntəqələrinin hamısında əmək haqlarının, pensiya və müavinətlərin ödənişi plastik kartlarla keçirilib. Rayon İcra Hakimiyyəti tərəfindən Böyük Vətən müharibəsi iştirakçısı və veteranına, şəhid ailələrinə, Qarabağ müharibəsi əlillərinə, Çernobıl əlillərinə və sosial müdafiəsi zəif olan digər əhali təbəqəsinə ərzaq və pul yardımı göstərilir. Bundan əlavə, sosial vəziyyəti ağır olan insanlara fərdi ev tikmələri üçün sement, mişar daşı və digər tikinti materialları verilib. Bu qəbildən olan insanlar daim rayon İcra Hakimiyyətinin və aidiyyəti təşkilatların diqqətindədir. Qeyd edək ki, Dövlət Sosial Müdafiə Fondunun Lənkəran şəhər şöbəsində proqnoz tapşırıqlara vaxtında əməl olunub. Belə ki, şöbənin kollektivi vətəndaşların müraciətlərinə çox həssas yanaşır, onları maraqlandıran məsələlərlə pensiyanın yenidən hesablanmasının bir sıra hüquqi aspektləri, stajla bağlı, digər məsələlərlə bağlı sorğularını cavablandırır, həllinə nail olurlar. Şöbənin səlahiyyətlərinə aid olmayan müraciətlər edən vətəndaşlara isə hüquqi və digər mümkün köməkliklərin edilməsi üçün həmin müraciətlər müvafiq orqanlara göndərilir.
Qarşıda görüləsi işlər çoxdur. Lənkəranlılar ilin sonunadək qazanılan uğurları artıracaqlarına, sosial-iqtisadi göstəriciləri daha da yüksəldəcəklərinə əmindirlər.