Prezident İlham Əliyevin sərəncamı ilə müstəqil Azərbaycanın inkişafının aparıcı sahələrindən olan nəqliyyat infrastrukturunun yenidən qurulması haqda “Yol xəritəsi” təsdiq edilmişdir.
Bu sənədə əsasən ölkəmizdə fəaliyyət göstərən bütün nəqliyyat növlərinin və onların material-texniki bazasının yenilənməsi, gələcək inkişafı öz əksini tapmışdır. Bu baxımdan, yük və sərnişinlərin daşınmasında əsas rol oynayan, yaranmasının 139 ilini qeyd edən dəmir yolu infrastrukturunun yenidən qurulması və inkişafı qarşıda duran əsas vəzifələrdən biridir.
Son illərdə ölkə daxilində bu sahədə sürətli təmir və yenidənqurma işləri aparılır, həmçinin ölkənin beynəlxalq nəqliyyat strukturlarına inteqrasiyası istiqamətində mühüm işlər reallaşdırılır. Onların sırasında Bakı-Tbilisi-Qars (Şərq-Qərb), Rusiyanı İran və Hind okeanı ölkələri ilə birləşdirəcək Şimal-Cənub nəqliyyat dəhlizləri vardır. Bu dəhlizlərin son 2 ildə istifadəyə verilməsi ölkəmizi qitələrarası nəqliyyat xabına çevirmiş, Bakı yaxınlığında Ələt dəniz limanının inşası isə Azərbaycanı beynəlxalq logistika strukturunun tərkib hissəsinə daxil etmişdir. Bütün bu görülən işlər həm də tələb edir ki, dəmiryolu vasitəsilə sərnişin və yüklər mənzil başına vaxtında və təhlükəsiz çatdırılsın. Bu baxımdan dəmiryol infrastrukturunun maddi-texniki bazasının müasirləşdirilməsi, yolların texniki təhlükəsizliyinin təmin edilməsi istiqamətində mühüm təmir və yenidənqurma işləri aparılır.
Sözügedən fəaliyyət isə “Dəmiryolservis” MMC (direktor Əli Əşrəf Lütfəlibəyovdur) əməkdaşları tərəfindən həyata keçirilir.
Dəmiryolunun fəaliyyətində əsas rol oynayan stansiyaların yolları və texniki qurğularının da istismara tam cavab verəcək səviyyədə olması bu struktur üçün həmişə prioritet məsələdir. MMC-nin bu istiqamətdə gördüyü işlər də təqdirəlayiqdir. Ölkənin bütün bölgələrini əhatə edən kollektivin fəaliyyəti nəticəsində 2019-cu ilin təkcə 9 ayı ərzində 64000 p/m yol, 11 dəst yoldəyişən qurğu əsaslı təmir edilmiş və yolda 4733 p/m relslər uzunölçülü rels tipində qaynaq edilmişdir. Qarşıda stansiya və depo yollarının daha 2500 p/m-i, eyni zamanda 15 yoldəyişən qurğu əsaslı təmir ediləcəkdir. Bununla yanaşı yol təmiri briqadaları tərəfindən Bakı-Sumqayıt-Bakı dairəvi yolunda və Biləcəri stansiyasında tək və cüt dairəvi yollarda təmir işləri aparılır. “Dəmiryolservis” MMC-nin tərkibində olan 24 nömrəli rels qaynaq qatarı (RQQ) tərəfindən də 2019-cu ilin sözügedən dövründə 24365 p/m müxtəlif təyinatlı yollar, o cümlədən 54 dəst yoldəyişən qurğu təmir edilmişdir. Görülən təmir və yenidənqurma işləri Bakı sərnişin, Ləcət, Bakı lokomotiv deposu, Biləcəri, Sumqayıtçay, Astara və digər dəmiryol stansiyalarında həyata keçirilmişdir. Bu baxımdan Şimal-Cənub beynəlxalq dəmiryol dəhlizinin istifadəyə verilməsi ilə bağlı mühüm strateji əhəmiyyət kəsb edən Astara sərhəd dəmiryolu stansiyasında aparılan işlər diqqəti xüsusi cəlb edir. Belə ki, burada 6400 p/m dəmiryolu əsaslı təmir edilmiş, 22 dəst yoldəyişən qurğu təmir edilərək yenidən quraşdırılmış, ərazidə 1000 kv2 sahilbərkitmə işləri aparılmışdır.
Bütün bu görülən işlər deməyə əsas verir ki, “Dəmiryolservis” MMC-nin kollektivi 13 oktyabrda qeyd ediləcək peşə bayramına yeni nailiyyətlərlə gəlib.
Kollektivi qarşıdan gələn peşə bayramı münasibətilə təbrik edir və əmin olduğumuzu bildiririk ki, əməkdaşlar 2019-cu ildə dövlətimiz tərəfindən onların qarşılarına qoyulan tapşırıqları layiqincə yerinə yetirəcəklər.