Milli Məclisin Mədəniyyət komitəsinin sədri Qənirə Paşayeva və Regional Hüquqi və İqtisadi Maarifləndirmə İctimai Birliyinin (RHİMİB) sədri Arzu Bağırova Masallı rayon, Xoşçobanlı kənd sakini, şəhid Məmmədağa Bağırovun atası Həsənağa Bağırovla görüşüb.

Axar.az xəbər verir ki, Qənirə Paşayeva Vətən müharibəsindən və əsgərlərimizin igidliklərindən danışıb, Ordumuzun sayəsində böyük və tarixi Zəfər qazandığımızı bildirib.

Millət vəkili qeyd edib ki, işğalçı düşmən üzərində qələbə münasibətilə təbriki ən çox şəhid valideynləri haqq edir:

“Biz Sizə çox minnətdarıq! Övladınızın ruhu qarşısında dərin ehtiramla baş əyirik!

Sizin oğlunuz Azərbaycan Prezidentinin 15 dekabr 2020-ci il tarixli Sərənmcamı ilə “Vətən uğrunda” medalı ilə təltif edilib.

Məmmədağa kimi əsgərlərimizlə hər zaman qürur duyacağıq!”

Tarixi zəfər münasibətilə şəhid əsgərin atasına Milli Məclisin Mədəniyyət Komitəsi və RHİMİB adından məktublar, üzərinə “Qarabağ Azərbaycandır!” yazılmış qol saatı təqdim edilib.