Rəsmi açıqlamalara əsasən, Azərbaycan Ordusu sentyabrın 27-dən bəri 3 rayon və 100-ə yaxın kəndi işğaldan azad edib. Bəs görəsən, bu ərazilər işğal edilmiş torpaqlarımızın neçə faizini təşkil edir?

Axar.az xəbər verir ki, ekspert Qubad İbadoğlu işğal altında olan torpaqlarımızın təxminən 16,5%-nin artıq azad edildiyini bildirib:

“Bu müharibədə ərazimizin 20 faizə qədəri işğal edilmişdi. İşğal ərazisi 12 min kv/km. ötürdü. Bu ərazinin hələ də 6-da 5-i, yəni 83.4%-i işğal altındadır. İnşallah, tezliklə onlar da azad olunar”.

Hərbi eksperti Üzeyir Cəfərov isə məsələyə yalnız “faizlə” yanaşmanın yanlış olduğunu deyib. O, azad edilən yerləri hərbi nöqteyi-nəzərdən qiymətləndirməyi doğru sayıb:

“Ordumuz Qarabağ ətrafında olan strateji əhəmiyyətli obyektləri artıq azad edib. Azad edilən bu ərazilərimizdə düşmən uzun illərdir mühəndis-istehkam və digər qurğular quraşdırmışdı. Azərbaycan əsgəri həm şimal, həm də cənub istiqamətində onları ələ keçirib. Bununla da bizim üçün vacib olan əsas istiqamətlər düşməndən azad edilib. Əks-hücum əməliyyatında komandanlıq çətini qoyub, asandan yapışmır. Bəziləri Ağdamın adının çəkilməməsindən narahatdır. Amma hazırda bizim üçün əsas strateji yerlərdir. Bu gün düşmən strateji əhəmiyyətli Cəbrayılı, Füzulini, Hadrutu, Zəngilanı itirib. İnşallah, yaxın vaxtlarda Qubadlı ilə bağlı da xoş xəbərlər olar. Bəzən düşmənin işğal olunmuş torpaqlarımızda qalmaq imkanı olmur. Silah-sursat, ərzaq yardımı olmadığı üçün ermənilər texnikanı qoyaraq ya qaçır, ya da təslim olur”.